Hasi da denboraldi berria Oiartzun Irratian
Oiartzun Irratiak herria informatzeko jardunean jarraitzen du. Denboraldi berriari ekin diote, eta hainbat saio berri ere ari dira prestatzen Itsaso Guemes eta Alazne Etxeberria kazetariak.
Urteak daramatza Oiartzun Irratiak informazioa zabaltzen, 25 hain justu, eta bide beretik jarraitzeko asmoa dute kazetariek. Izan ere, 2024-25 denboraldiari ekin diote egunotan, eta gaur-gaurkoz berritasun handirik ez badute ere, hilabete batzuen bueltan izango dira irratiaren uhinetan ahots, kontu, eta gai berriak.
Arguyuan saioa da Oiartzun Irratiko saio nagusia, eta horren barruan biltzen dira elkarrizketak, kolaboratzaileak eta gainerakoak. 10:30ean hartzen dute hitza Arguyuan saioko esatariek, eta 13:15 bitartean albisteak, prentsa errepasoa eta eguraldia ematen dituzte, besteak beste. Tarte horretan, egunero, lehiaketak ere egiten dituzte —zozketa ostiraletan egiten dute—.
Arratsaldean ere ez da irratia isilik geratzen, ez, goizeko saioen errepikapenak izaten baitituzte. Gainera, 16:00etatik 18:00etara Arrosa Sarearekin —Euskal Herriko 23 irrati biltzen dituen federazioa— egiten dute konexioa, Zebrabidea saioan hartzen baitu parte Oiartzun Irratiak.
Bestalde, elkarrizketak eta askotariko gaiak ere izaten dituztela kontatu du Itsaso Guemes kazetariak: herriko gai batzuen inguruan izaten dira solasaldi batzuk, baina gainontzekoak kolaboratzaileenak izaten dira. Esaterako, Landetxeko agendaren errepasoa, oarso bidasoko hitzarekin kolaborazioa, udalaren agendaren errepasoa, Euskal Herriko txokoen bidaien atala eta, horiez gain, Kirolez blai, Axeyan txokotik, Ziklizitatea gorpuzten, Zana zalako, Munduari so, Literhari, Lanin, Il4argiren txokoa eta Aitziyo saioak.
Berritasunak ere iristear
Denetarik eta denentzako saioak dituzte Oiartzun Irratian, baina dirudienez ez dira nahikoa. Beste bi saiori forma ematen ari dira; badakite zeren inguruan ardaztuko dituzten, baina ez dute oraindik izenik ere. Aurreratu dute, ordea, urriaren bueltarako-edo jarri nahi dituztela martxan. Alazne Etxeberria esatariak azaldu du beste erakunde batzuekin elkarlana sendotzeko lanetan ari direla, hala nola, Hitzarekin.
Denboraldi berriaren inguruan hitz egiterakoan, ezin ahantzi 25. urteurreneko ospakizun handia, uztailaren 13an izan zena. “Ederra, ederra izan zen. Ondo atera zen dena”, esan du Etxeberriak. Horiek izan dira mende laurdena ospatzeko egin zuten jaialdiaren inguruan galdetuta atera zaizkion lehen hitzak. Erabateko inplikazioa sumatu zuten; are, ezarri zituzten espektatibak “gainditu” egin zituzten. “Egun biribila izan zen”.
