Emozioz eta ospakizunez beteriko mendeurrena
Lehen Kontxako Bandera irabazi zutenetik 100 urte igaro direla ospatu zuten sanjuandarrek larunbatean, behar bezala. Emozioz jositako eguna izan zen.
Mendeurreneko ospakizuneko argazki bat. Iragan asteburu hau arrosa izan dela zalantzarik ez da. Play-offetik harago, larunbata arraunaren zaleentzako garrantzitsua izan zen, bereziki herriko helduenentzat. Izan ere, 100 urte bete ziren larunbatean San Juanek lehen Kontxako Bandera irabazi zuenetik, eta behar bezala ospatu zuten mendeurren biribil hori.
Egun osoko egitarauaz gozatu zuten sanjuandarrek, Matxet kultur elkarteari esker. Omenaldiak, emanaldiak, herri bazkaria, musika saioak… Garaipen handi hura gogoratu eta ospatzeko denetik izan zen, emozioz beteriko eguna izan zen, bereziki bandera hura ekarri zuten gizonen senide eta gertukoentzat. Giro ezin hobean igaro zen eguna, eta Portugaletetik heldutako albisteak eguna birbildu besterik ez zuen egin.
Matxet elkarteko eta era berean orduko eskifai garailea hura gidatu zuen Francisco Laboa Matxet patroiaren hereniloba Iñaki Altolagirre Matxet-ek aitortu du “asteburu oso-oso polita eta berezia” izan dela. “Sanjuandarrentzako asteburu biribila izan da. Larunbatekoa oso-oso polita izan zen. Ekitaldi musikatuetan une oso hunkigarriak bizitu genituen, bi saioetan lepo beteta geratu zen Juanba Berasategi. Eta dena biribiltzeko, igandeko albistea heldu zen. Sanjuandar guztiak harro gaude”.
HITZAk larunbateko ospakizuneko argazki gehiago jaso ditu. Ondorengoak, Unai Huizi argazkilariarenak dira:
