"Garaipen handi hau lortuta, helburu guztiak bete ditugu aurten"
Eusko Label Ligara itzuliko direla ospatu zuten atzo sanjuandarrek, behar bezala. Santiago plaza arrosez tindatu zuten zaleek, lepo beteta utzi zuten.
Santiago plaza lepo beteta utzi zuten zaleek. Larunbatekoa ahaztezina izan bazen (Lehen Kotxa irabazi zutenetik 100 urte ospatu zituzten), atzokoa ere sanjuandarrei memorian iltzatuta geratu zaien egun horietako bat izan zen. Izan ere, Erreka traineruak, sei urteren ondoren, lehen mailan, hau da, Eusko Label Ligan, ariko da, play-offean onenak izan ondoren. Behar bezala ospatu zuten garaipen handia, Santiago plaza arrosez tindatu zuten bertaratutako zale guztiek.
Portugalen hasi ziren ospakizunekin, eta arratsaldean Donibanera heldu ziren kirolari eta klubeko kideak. Portugaleten hamarka eta hamarka zaleren babesa izan bazuten, Donibanen ehunka eta ehunka izan ziren.
Play-offa lortu duen traineruaren entrenatzaile Joseba Fernandezek aitortu du asteburu “bikaina eta ederra” izan dela: “ederra izan da, ez bakarrik play-offean garaipena lortu dugulako, baizik eta herrian berriz ilusio hori piztu delako. Horrenbeste jende mugitzea, hor ikustea eta emozionatuta gainera, oso polita izan da”.
Kirol arloari dagokionez, “bi estropada sendo” jokatu dituztela aitortu du, bi jardunaldietan “oso gustura” aritu zirela arraunlariak. “Garaipen handi hau lortuta, helburu guztiak bete ditugu aurten. Liga bikaina, txapelketa bikainak eta play-off bikaina. Orain ospatzea tokatzen da, errekuperatzea, oporrak hartu eta datorren urtean TKE ligari begira ilusio guztiarekin gure bidean jarraitzera”.
Jarraian HITZAk jasotako argazkiak eta bideoak ikus daitezke:
