Udal liburutegia eraldatzeko prozesua aurkeztuko dute ostiralean
Udalak eta Ku-ku Haur eta Gazte Literatur Ekimenak 'Bazen behin liburutegi bat' izeneko prozesua jarriko dute martxan liburutegia eraldatzeko.
Ostiralean (hilak 20) aurkeztuko dute Arizmendieneako lorategian liburutegia eraldatzeko prozesu parte hartzailea. Zehazki, Oiartzungo herritarrek behar duten liburutegi eredua “modu kolektiboan birpentsatu eta diseinatzeko” prozesua jarriko dute martxan udalak eta Ku-ku Haur eta Gazte Literatur Ekimenak. Bazen behin liburutegi bat izena jarri diote gogoeta eta eraldaketa ekimenari.
Gaur egungo liburutegiaren funtzio, zerbitzu eta espazioak ikuspegi komunitarioago batetik formulatu nahi dituzte, biblioteka eragile komunitario eta azpiegitura sozial gisa ulertu eta askotariko herritarren beharretara eta prozesu sozial eta kulturalen zerbitzura egongo den egitasmoa izan dadin.
Irailetik ekainera arteko lanketa parte hartzailea egingo dute, eta metodologia eta parte hartzeko bideak askotarikoak eta egoera eta kolektibo bakoitzari egokituak izango dira. Horretarako elkarrizketa sakonak, zehatzak, informalak, taldekoak, bakarkakoak nahiz galdetegi ezberdinak baliatuko dituzte.
Hilabete bakoitzean sektore, eragile edo kolektibo zehatz batzuengana zuzenduko dira, “ziurtatzeko herriko aniztasuna ordezkatzeko adina ahots eta ikuspegi biltzen dituztela”. Bereziki, udalak esan duenez, erdigunean kokatu nahi dituzte kolektibo zaurgarrienak, liburutegiaren erabiltzaile potentzialak direnak eta prozesuko ohiko deialdietan bestela parte hartuko ez luketenak -izan hizkuntzagatik, ordutegiagatik edota halako markoen ezaugarriengatik-.
Hala ere, eztabaida horiez gain hiru hilabetean behin eztabaida enborrak egingo dituzte liburutegian. Orokorragoak izango dira horiek, eta “liburutegiaren nahiz prozesuaren gainerako ikuspegi zabal bat eskainiko dute”.
Prozesua koordinatzeko talde motor bat osatu dute udalak, Ku-ku eragileak, Juntura arkitektoen kooperatibak eta Aise prozesuen fazilitaziorako kooperatibak. Talde motor horrekin lehen geruza izeneko markoa arituko da lanean prozesuaren kalitatea eta ordezkaritza zabala bermatu eta sektore edo eragilekako eztabaiden eta galdeketen artikulazio eta dinamizazio lana egiteko.
Gogoeta eta eraldaketa prozesuaren aurkezpen publikoa 19:00etan izango da.