Gaur eta biharko alerta horia dela eta, "tentuz ibiltzeko" deia pasaitarrei
Itsasgorak irauten duen bitartean urak tarte batez itsasertza gainditu dezakeela ohartarazi du Segurtasun Sailak. Udalak zenbait neurri hartu ditu.
Donibaneko Santiago plazan itsasgorak ekiditeko sistema berria jarri dute. Eusko Jaurlaritzaren Segurtasun Sailak gaur (hilak 18) eta bihar (hilak 19) itsasaldi oso bizia izango dela aurreikusi du, eta hortaz, itsasgorak irauten duen bitartean urak tarte batez itsasertza gainditu dezakeela ohartarazi du. Ondorioz, Pasaiako Udalak beharrezko prebentzio eta babes neurriak hartu ditu eta zenbait gomendio eman dizkie pasaitarrei.
Gaurko abisu horia ezarri dute, 17:00etatik 19:00etara aurreikusi dute itsasaldeko arriskua. Itsasaldi oso bizia espero da. Biharko ere antzeko egoera aurreikusi dute. 17:00etatik 20:00etara aurreikusten da izango dela arriskurik handiena. Bihar itsasaldia erabat bizia izango da.
Udaltzaingoak Donibane kalean zein Torreatzen bizi edota ibiliko direnei deialdi berezia egin die, “tentuz ibiltzeko”. Horrez gain, Santiago plazan aparkatzea debekatuko dute alertak iraun bitartean. Eremu horietan zenbait neurri hartu ditu jada erakundeak.
Zehazki, ondorengoa eskatu diete herritarrei: Etxebizitza/lokala itsasoko uraren balizko inbasioaren aurrean babesteko; olatu handiak badaude itsasotik urrun egoteko eta argazkiak eta bideoak ekiditeko; arrantza jarduerak saihesteko; itsas ertzetik gertu autorik ez erabiltzeko; hondartza apartatuetan ez bainatzeko; bandera gorriko hondartzetan ez bainatzeko; itsasoak kaltetutako eremuetan kirol eta nautika praktikarik ez egiteko; itsasontzia dutenei babestuta jartzeko; leku arriskutsuetan dauden herritarrak ohartarazteko; uretara eroriz gero olatuak hausten diren lekutik aldentzeko eta korronteen kontra ez borrokatzeko; eta, lehorrean daudenei eta norbait uretara erori dela ikusten dutenei kabo edo flotagailu bat bota eta 112 telefonora deitzeko.
