Roberto Lopez de Etxezarreta Pasaiako alkate ohia zendu da
Udalak doluminak adierazi dizkie familia, lagun eta gertukoei. "Bere bizitza eta ibilbide politikoa Pasaiako komunitatearen zerbitzura egon dira, eta horregatik beti izango dugu bere ekarpena gure memorian".
Roberto Lopez de Etxezarreta Murgiondo Pasaiako alkate ohia zendu da, 90 urterekin. Udalak adierazpen bat kaleratu berri du, doluminak adierazi eta alkate ohiak egindako lana goraipatzeko. “Bere bizitza eta ibilbide politikoa Pasaiako komunitatearen zerbitzura egon dira, eta horregatik beti izango dugu bere ekarpena gure memorian. Lerro hauen bitartez, Pasaiako Udalaren eta bere Udalbatzaren izenean, familia, lagun eta gertukoei gure doluminak adierazi nahi dizkiegu. Lurrak goxo har zaitzala Roberto”, dio kaleratu duten adierazpenak. 1983-1987 agintaldian izan zen Pasaiako alkate.
Alkate ohiaren omenez, lau barrutietako eraikin publikoetako ikurrinak haga-erdira jarriko dira eta datorren astearteko (hilak 24) udalbatzan minutu bateko isilunea egingo dute.
