'Zeru ahoak' telesaila filmatuko dute Pasaian
Gaur Antxon ariko dira eta hilaren 27an Trintxerpen. Narratiboki autonomoa izango bada ere, 'Hondar ahoak' lanaren jarraipena izango da.
Narratiboki modu autonomoan funtzionatuko badu, 'Zeru ahoak' telesaila 'Hondar ahoak' (2020) lanaren jarraipena izango da. Pasaia, beste behin, telesail baten plato edo agertoki bilakatuko da. Koldo Almandoz zuzendariaren Zeru ahoak telesailaren zenbait pasarte herrian grabatuko dituztela jakinarazi du Lurrazpiko Films AIE ekoiztetxeak. Narratiboki modu autonomoan funtzionatuko badu ere, lan berri hau Hondar ahoak (2020) telesailaren jarraipena izango da. Primeran plataforman izango da ikusgai.
Gaur (hilak 18) hasiko dira grabaketekin, Antxon hain zuzen. Hamarretxeta kaleko 19. zenbakian egingo dituzte grabaketak, goizetik 22:30ak arte. Grabaketek trafikoan ez dutela inongo eraginik izango jakinarazi du udalak, soilik oinezkoen pasabidea une zehatz batzuetan erregulatuko beharko dute.
Hilaren 27an (ostirala da) izango da bigarren grabaketa eguna. Oraingo honetan Trintxerpeko Araneder kalean ariko dira, gauez. 19:30etik 5:00era bitarte ariko dira horretan. Grabaketa lanek ahalbidetzen badute, ekoiztetxeak jakinarazi du lehenago bukatuko dituztela lanak.
Ohartarazi dute uneren batean ke edo su efektuak antzematea “normala” izan daitekeela, grabaketen parte izango direlako. Espezializatutako enpresa batek kontrolatuko ditu su eta ke horiek.
Trintxerpeko grabaketentzat zenbait trafiko mozketa egin beharko dituzte Arrandegi kalean. Horrez gain, Aranederren ezingo da autorik aparkatu egun horretan. Alternatiba gisa, ostiraletan Hospitalilon erabilgarri egoten den aparkalekua erabiltzeko gomendioa eman du Pasaiako Udalak.
