Hamaikagarren OrriBakaR aktibatu dute
Andreone Udal Liburutegiaren literatura lehiaketara lanak aurkezteko epea azaroaren 22ra arte da zabalik. Sarien entrega abenduaren 13an egingo dute.
Iazko saridunen eta udal ordezkarien talde argazkia. Martxan da 2024ko OrriBakaR Literatura Lehiaketa. Hamaikagarrena da; jada, parte hartzeko eskubidea duten haur askoren adinera iritsi da gaztetxoenen literatur sormenera begira den sariketa. Lanak, orri bakarrekoak gehienez eta edozein genero literario (bertsogintza, olerkigintza, ipuinak, kazetaritza, komikiak…) erabiliko dutenak izan daitezke, gai librekoak eta inoiz argitara gabeak: horiek aurkezteko azaroaren 22ra arteko epea dago, Lezoko Andreone Udal Liburutegian. Sari emate ekitaldia abenduaren 13an jasoko du herriko kultur topaguneak (19:00).
Bost kategoriatan, adinaren arabera sailkatuak, aurkez ditzakete lanak haurrek. Baldintza bat: Lezoko biztanleek edo Lezoko liburutegiko bazkideek eman ditzakete sormenak:
- A mailarako 6-7 urtetakoen lanak hartuko dituzte.
- B mailan, berriz, 8-9 adin tartekoenak.
- D maila 10-11 urte dituztenena da.
- E mailara 12-13 dituztenak bideratu dituzte.
- F maila gazte koskorrena da, 14-15 urtekoena.
Epaimahaiko kideak antolatzaileek hautatuko dituzte. Haien erabakiak apelaezinak izango dira, eta gerta liteke sariren bat eman gabe izatea aurkeztutako lanek ez dutelako izan behar adinako maila. Sari emate ekitaldiaren aurretik (abenduaren 13an da) jakinaraziko dituzte bost kategoriatako irabazleak Lezoko liburutegiaren blogaren bitartez. Horien guztiem artean hamar sari banatuko dira, bina kategoriako: liburuak erosteko 100 euroko bale bana jasoko dute garaileek.
Nola eman lanak?
Aurkeztuko diren lanek orri bakarrekoak behar dute izan. Hala, udal liburutegiko entrega aurretik hainbat alor hartu behar dira kontuan:
- Orriaren goiko aldean izenburua idatzi behar da.
- Lan bakoitzeko gutunazal itxi bat aurkeztuko da. Gutunazalaren kanpoko aldean lanaren izenburua eta egilearen adina jarriko dira; barruko aldean, berriz, egilearen helbidea, telefono zenbakia eta izen-abizenak.
- Lana kanpoaldean joango da, eta gutunazala grapaz lanari josia.
- Ikastetxearen izena daraman lanik ez da onartuko.
