AEKn Euskara ikasteko diru laguntzak emango ditu udalak
12 urte bitarteko haurren guraso zein aitona amonek matrikularen %33 baino ez dute ordainduko. A1 eta C1 mailari begirako ikasleek ere beherapena izango dute.
Euskara eroso bizitzeko lelopean zabaldu du 2024-25 ikasturteko matrikula garaia AEK-k, eta kanpaina horri bultzada eta oihartzuna emateko asmoz, Lezoko Udalak, Oroitzene AEK-k, Hezikuntza eta Errota Herri Eskolak eta Pasaia-Lezo Lizeoko guraso elkarteek agerraldia egin dute.
Iker Salaberria, Euskara zinegotzia: “Lezo UEMAko herria da, eta euskaraz bizi nahi duen herria. Horretarako, ordea, administrazioen zeregina da herritarrei baliabideak eskaintzea. Gure lehen erronka, lezoar guztiei euskara ezagutzeko eskubidea bermatzea da, hori baita aukera berdintasuna bermatzeko bidea eta guztiok euskaraz eroso bizi ahal izateko baldintza”. Ildo horretatik, azaldu dute 12 urte bitarteko haurrak dituzten guraso zein aitona-amonei matrikula murriztua eskainiko zaiela; hau da, %33 besterik ez dutela ordaindu beharko. Gainera, ikasturte amaieran %75eko asistentzia izan dutela frogatzen duten ikasleei matrikulan ordaindutako diru kopurua itzuliko zaie.
Horretaz gain, AEK-ko Idoia Arbelaitz eta Edurne Lizarazuk kontatu dute matrikula prezio berezia izango dutela A1 mailakoek zein C1 mailari begirako 16 eta 18 urte bitarteko nerabeek, “helburua euskara eroso ikastea eta bizitzea baita”.
Salaberriak, amaieran, herritarrak matrikulatzera eta euskara ikastera gonbidatu ditu: “Euskara ikasteko pausoa emango duen edonori herri bizitza sakonago bizi eta gozatzea, lan aukera berriak izatea, harreman berrietara zabaltzea, edota kultura berri bat ezagutzea ekar dakieke. Lezon euskaraz bizi dugun guztiok ere biziki eskertuko diegu ahalegina”.
Ikasturte honetan A1, A2, B1, B2, C1 eta C2 mailetako eskolak emateaz gain, hizkuntza eskakizunak ateratzeko ikastaroak; mintza taldeak; goizeko, eguerdiko eta arratsaldeko jardunak; lanean txandaka arituz gero euskaltegian ere txandaka aritzeko aukera eta aurrez aurreko eskolak edota autoikaskuntzaren bidez ikasteko aukerak eskainiko dituzte.
