"Udaltzaingoa modernizatzeko eta herritarrengana hurbiltzeko" plan bat proposatu du PSE-EEk
Tokiko polizia "birpentsatu eta berrantolatzeko une egokia" dela uste dute taldekoek. Joxean Sanchez bozeramaileak esan du "inflexio puntu bat behar dela".
Lezoko PSE-EEk ohar bat bidali berri die hedabideei. Honetan adierazi dutenez, plan zuzentzaile bat egiteko proposamena egin dute, “Udaltzaingoa modernizatzeko eta herritarrengana hurbiltzeko” asmoz. Udaltzainen zerbitzua “garai eta behar berrietara egokitzeko eta herritarrei gertuko eta kalitatezko zerbitzua eskaintzeko” asmoa du haien proposamenak.
Taldekoek adierazi dute “une egokia” dela “tokiko polizia birpentsatu eta berrantolatzeko”. Joxean Sanchez taldeko bozeramaileak esan duenez, “inflexio puntu bat behar da, eta plan zuzentzailearen sorrerak zerbitzua modernizatzeaz gain, herritarren segurtasun eskaeretara egokitu behar du”.
Plan hau “hausnarketa prozesu batean” oinarrituko litzatekeela dio, eta barne zein kanpoko diagnostiko bat jasoko lukeela, “herritarren eta tokiko eragileen parte hartzearekin”. Prozesu horri esker, egungo zerbitzuaren “ikuspegi integrala” lortu nahi du PSE-EEk, “oraingo eta etorkizuneko erronkei erantzungo dien estrategia bat definitzeko”.
Besteak beste, honako helburu hauekin egin dute eskaera: “delinkuentzia eta gizartearen aurkako beste jokabide batzuk murriztea, eskola inguruetako jarduerak, ibilgailuen kontrola hobetzea, genero indarkeriagatiko salaketei lehentasuna ematea, azpiegituretan kalteak identifikatzea eta kontrolatzea eta herritarrengana gehiago hurbiltzea auzotarren arazoak zuzenean ezagutzeko”.
Azken urteotan Lezon “aldaketa asko” izan direla esan dute azkenik, eta horrek eragina izan duela “Udaltzaingoaren lanean”.
