Orreagako garaileei harrera egin diete Oiartzunen
Azoka eta Txikien Erresuma izan dira goizean Oiartzunen; arratsaldean, berriz, gerlarien ezpata borroka erakustaldia eta biltzarra izango dira.
Eguraldiaren pronostikoak sortutako urduritasunaren ondoren eta aste luze bat pasa ondoren, egitarau osoarekin aurrera egin eta eguzki izpien artean hasi dute Oiartzungo Erdi Aroko II. Jardunaldien hirugarren eguna.
Goizeko hamaiketan eman du pregoia Nikole Galardik, berak sortutako pieza batekin. Jende ugari zebilen plazan, eta herritarrak gustura ibili dira Erdi Aroko artisau eta elikagai postuetan. Gainera, Arma Aretoko kideen eskutik beren ezpatak eta armadurak ezagutzeko aukera izan dute bertaratu direnek. Hots, herriko txikienek ere izan dute non jolastu: Txikien Erresuman. Eskulanak, jolasak eta Lur Kortaren eskutik ipuin kontaketa bat ere izan dute. Gero, 13:30ean bigarren pieza batekin ospatu dute Orreagako bigarren garaipena; buruzagi baskoiak eta konde frankoak (atxilotuekin) elkartu dira.
Arratsaldean, buruzagi baskoien iritsierarekin batera, gerlarien ezpata borroka erakustaldiaz eta biltzarraz gozatzeko aukera izango dute oiartzuarrek.
