'Burujabetzak' aurkeztu dute Udalbiltzak eta Oiartzun Burujabek
Urriaren 17, 18 eta 19an izango dira 'Burujabetzak' jardunaldiak. Ekimenak doakoak eta irekiak dira, baina izena eman behar da kasu batzuetan.
Udalbiltzak eta abiatu berri den Oiartzun Burujabe herri proiektuak Burujabetzak jardunaldiak antolatu dituzte elkarlanean, eta, urriaren 17 eta 18an egingo dituzte Oiartzunen jardunaldiak. Gainera, urriaren 19a Oiartzungo Burujabetzen eguna izango da, eta Oiartzun Burujabek oiartzuarrak herri itunarekin konprometitzera deitu ditu.
“Oiartzunen badira urte batzuk burujabetza ezberdinak lantzen ari garela. Orain, Oiartzun Burujabe herri proiektua abiatu dugu. Iaz Hernani Burujabek egin zituen jardunaldien ondotik, garrantzitsua ikusten genuen herrian bertan jardunaldiak antolatzea; bertan martxan dauden proiektuak ezagutarazi eta balioan jartzea; eta, aldi berean, beste tokietan egiten ari direna ezagutu eta bertatik ikastea”, azaldu du Olaia Lasa zinegotziak.
Bestalde, Haritz Alberdi lehendakariak azaldu du Udalbiltzaren erronketako bat dela tokian toki egiten ari diren esperientzietan fokua ipintzea eta, ahal dela, laguntzea. “Gure helburua ekarpena egitea da: irtenbide batzuk bilatu eta eskalatu egin nahi dugu. Ikusten dugu herrietan eta eskualdeetan, proiektu berritzaile eta eraldatzaileak ari direla sortzen, eta baliabideak jarri nahi ditugu horiek eskalatzeko”.
Jardunaldi hauek “herrigintza eta udalgintza eraldatzaile ikuspegitik jaiotako proiektuak” ezagutzeko aukera emango dute. Egun horietan herri eskolako proiektuak aurkeztuko dira, burujabetza eta trantsizio ekosozialak, parte hartzearen paradigma berriak edo udalgintzatik estatugintzarako jauzia nola egin, besteak beste.
Ekimen guztiak doakoak eta irekiak izango dira, baina ostegun eta ostiral goizeko ekimenetan parte hartzeko izena eman behar da, hemen.
