'HaurKultur Zikloa' aurkeztu dute Oiartzungo hainbat eragilek
Udalak, Soinueneak, Abaraxka Ludotekak eta Antzerkizaleak elkarteak hamar hilabetean zehar gaztetxoei zuzendutako programazioa aurkeztu dute.
Oiartzungo Udalak, Soinuenea Fundazioak, Abaraxka Ludotekak eta Oiartzungo Antzerkizaleak elkarteak gaztetxoentzat Landetxen eskainiko den programazioa aurkeztu dute: HaurKultur Zikloa. Zehazki, hamar hilabetean zehar publiko gaztearentzat diseinatu eta pentsatutako emanaldi ezberdinak ikusteko aukera izango dute: hala nola zinema, herri musika kontzertuak, antzerkia eta zirkua. Eta ildo horretatik, Soinueneako Joseba Zabaletak nabarmendu du politena dela erakunde edo elkarte ezberdinak elkartu eta egitarau bateratu bat sortzea.
Zikloaren agertoki nagusia Landetxe izango da, baina ekimenaren arabera herriko beste areto edo espazio batzuk ere baliatuko dituzte.
Landetxeko emanaldi guztiek 5€-ko prezioa izango dute; zineak, aldiz, 3€-koa. Haatik, beste guneetan antolatutako ekintzak dohainik izango dira, eta sarrerak erosteko edo gonbidapenak lortzeko Landetxeko takila edo udalaren webgunera jo beharko da.
Oraingoz, hau da aurkeztu duten programazioa:
- Urriak 26, 16:30, Landetxe: Soinuenean behin. JM Beltran laukotea.
- Azaroak 16, 16:30, Landetxe: Zinea.
- Abenduak 27, 18:00, Landetxe: Yarleku antzerkia. 104. Haurra.
Hots, Lur Korta Antzerkizale elkarteko kideak aipatu du haurrei zuzendutako antzerkiek gero eta arrakasta gehiago dutela ikusi dutenez, erabaki dutela hiru hilabetean behin haurrei begirako zerbait prestatzea.
Bestalde, 2025 urteari begira ere aurreratu du otsailaren 8an Astrolabium konpainiaren Butterfly effect! antzerkia egongo dela, eta baita Eriz Alberdiren Munduari itzulia 80 egunetan apirilaren 4ean. “Ez da erraza izaten haurrentzat euskaraz programazioa topatzea; guk dena euskaraz programatzen dugu, hori da gure borroka hasieratik “, gehitu du.
