Zazpi espazio publiko erabiltzeko akordioa sinatu dute udalak eta portuak
Aldundiak finantzatutako hitzarmen bat sinatu berri dute bi aldeek. Hala, 76.000 metro koadroko eremu baten kontserbazioa bere gain hartuko du udalak.
Atzo (hilak 24) Gipuzkoako Foru Aldundiak finantzatutako hitzarmen bat sinatu zuten Pasaiako Udalak eta Pasaiako Portu Agintaritzak. Akordio honen arabera, portuko lursailean dauden zazpi espazio publiko udalaren esku geratuko dira datozen lau urteetarako. Atzo sinatu zuten hitzarmen akordioa Joakin Telleria Pasaiako Portu Agintaritzako presidenteak, Teo Alberro alkateak, eta Azahara Dominguez foru diputatuak.
Ordezkariek zaldu zutenez, 2024an jarriko da indarrean hitzarmena eta horren arabera, udalak bere gain hartuko du 76.000 metro koadro inguruko azalera duten zazpi eremuren kontserbazioa. Eremu horien artean, Herrerako biltegien estalkia edo Trintxerpeko kaia daude. Udalak 400.000 euroko jasoko ditu horretarako, eta hortaz, ez du inolako inbertsio gehigarririk egin beharko lan horientzako. Lau urteko indarraldia izango du akordioak, eta urteko luzapenak egiteko aukera izango da.
Atzoko udalbatzan onartutako eta bi aldeek sinatutako hitzarmen horrek zehazki 76.474 metro koadroko azalera hartzen du, Euskotreneko Herrerako geltokiaren eta San Pedroko Puntak arteko eremuetan: Herrerako biltegien estalkia (6.900 m2), Euskadi etorbidea 1 (4.700 m2), Euskadi etorbidea 2 (3.800 m2), Trintxerpe kaia (11.900 m2), lonja (26.600 m2 terrazaren edo estalkiaren eta plazaren artean), Arraunlari kalea (8.400 m2), Torreatze-Puntak (6.500 m2).
Akordio horren arabera, 400.000 euro jasoko ditu udalak aldundiaren eskutik, “akordioan jasotako erabilera publikorako espazio irekien kontserbazioari eta mantentzeari ekiteko”.
Eremu berriak mantentzeko lan horiekin espazioak jendearentzat irekita daudenean hasiko direla iragarri zuten atzo. Horren arabera, jendeari ireki aurretik obrak egin beharko dituzte.
“Beste urrats bat”
Alkateak adierazi du hitzarmen hori sinatzea “beste urrats bat” dela portua eta herria integratzeko bidean, eta pasaitarrentzat aisialdirako aukerak sortzen jarraitzen dutela. “Hitzarmen honek aukera ematen digu bermatzeko herritarren egunerokotasunean ezinbestekoak diren espazioak erabilera publikorako irekita egongo direla aurrerantzean ere, eta egoera onean mantendu ahal izango ditugula Gipuzkoako Foru Aldundiaren lankidetzari esker”, esan du.
Telleriaren arabera, akordio hau “Portu Agintaritzak azken urteotan Portu eta hiri arloan egin dituen jarduera guztien gailurra” da. Azkenik, Dominguezek gogorarazi du “beharrezko aldez aurreko urratsa” dela bere sailak egindakoa, “udalak bere gain hartzen dituen mantentze lanak finantzatu ahal izateko”. Badiaren “biziberritze integralarekin” aldundiak duen konpromisoa berretsi du Dominguezek.
