Konpetentzia digitalen gaineko zortzi tailer ondu dituzte Don Boscok eta Talaiosek
Eremu profesionalera zuzendutako konpetentzia digitalak lantzeko tailerrak dira, eta arratsaldez emango dituzte, doan.
Don Bosco eta Talaios Kooperatibak elkarlanean eremu profesionalera zuzendutako konpetentzia digitalak lantzeko zortzi ikastaro prestatu dituzte. Hartzaileak, nagusiki, eremu profesionalean ari direnak badira ere, heldu guztientzat oro har zabalik direla ikastaroak azaldu dute antolatzaileek.
Tailerrak arratsaldez izango dira, 16:00etatik 20:00etara, eta bina saio izango dituzte. saioak, berriz, Torrrekuan eta Don Boscon emango dituzte eta titulazio ofiziala izango dute ikastaro denek.
Moddle erabiliz ikastaroak sortzeko tailerra urriaren 8an eta 10ean egingo dute; Don Boscon izango da lehen saioa, eta Torrekuan bigarrena. Worpress erabiliz webgunea sortzeko tailerra ere egingo dute. Urriaren 15ean Don Boscon izango da saioa eta 17an Torrekuan. Hirugarren tailerra, Odooren gainekoa izango da eta urriaren 22an eta 23an egingo dute, Don Boscon eta Torrekuan, hurrenez hurren.
Nextcloud, Google Driven alternatiba librearen gaineko bi saio egingo dituzte, halaber, urriaren 29an lehena Don Boscon, eta urriaren 31n Torrekuan bigarrena. Euskarazko baliabide digitalen gainekoa da eskainiko duten bosgarren ikastaroa. Azaroaren 5ean eta 7an izango dira horren saioak, Don Boscon lehena eta Torrekuan bigarrena.
Segurtasuna ere izango dute hizpide sarean eta mugikorrean egunerokoan ziurtasunez aritzeko (azaroaren 12an eta 14an). Sistema eragile libreen gaineko ikastaroa, berriz, azaroaren 19 eta 21ean izango da, eta Docker eta Docker composeren gainekoa, azaroaren 26an eta 28an.
Ikastaroetan izena emateko klikatu hemen. Zalantzak argitzeko, 943 51 04 50 telefono zenbakira deitu behar da edota posta elektronikora mezua bidali (klik hemen).
