Bizi-lagun, herria ahalduntzea helburu duen taldea
Bizi-lagun elkarteak larrialdiei aurre egiteko ikastaroak antolatu ditu. Irailean egin dute lehen saioa, eta azaroaren 20an eta urtarrilaren 22an izango dira hurrenez hurren datozenak.
Bizi-lagun elkartea COVID-19a baino lehen sortu zuten Oiartzunen emergentzien inguruan kezka zuten hainbat profesionalek: sanitarioek, suhiltzaileek, udaltzainek eta baita alor horretan jarduten ez duten zenbait herritarrak ere.
Karlos Ibarguren osasungintzako profesionala da, baita Bizi-lagun elkarteko kidea ere, eta kontatu du elkartea sortzea pentsatzen ari zirenean herrian zenbait bihotz geldialdi eta suteren bat ere egon zirela. “Horren aurrean zerbait egin behar genuela pentsatu genuen. Polita da jendea ahalduntzea eta herritarrek jakitea emergentzien aurrean zer egin behar den eta zer ez”.
Esan eta egin. Emergentzien aurrean ahaldundutako oiartzuarren sarea zabaltzen jarraitu nahi dute, eta datozen hilabeteetarako prestakuntza saioak antolatu dituzte. Irailaren 18an egin zuten lehena, eta hurrengo bi saioak azaroaren 20an eta urtarrilaren 22an izango dira, 18:00etatik 21:00etara, Landetxen. 60 lagunentzat egongo da lekua ikastaroetan, baina nahikoa da izena saio bakarrean ematea. Landetxeko leihatilan edo webgunean eman behar da izena.
Auzokideak ahalduntzeko, saioak
Ohiko emergentzia bortitzen aurrean bizilagunak zer egin behar duen azaltzeko hiru arlo lantzen dituzte saioetan: sanitarioek bihotz-biriketako geldialdiez hitz egiten dute; suhiltzaileek sute baten aurrean zer egin —eta zer ez— erakusten dute; eta udaltzainek azaltzen dute istripu edo emergentzia egoera batean nola babestu behar den norbere burua, nola abisatu behar den, eta baita nola sorotsi behar den ere.
Ikastaroaren hasieran, izena eman duten guztiak elkartu eta azalpen teorikoak ematen dizkiete. Gero, ordea, hogei pertsonako hiru taldetan banatzen dituzte partaideak. Talde bati oinarrizko bihotz biriketako berpiztea egiten —nola egin behar den masajea, zer egin behar den arnas bideak itxita egonez gero irekitzeko…— erakusten diote; beste talde batek desfibriladorea erabiltzen ikasten du; eta hirugarren taldeak mangerak eta su itzalgailuak ezagutzen ditu, suhiltzaileen laguntzaz.
Bizkai, Araba eta Gipuzkoan, hilabetean, 70 bihotz-birika geldialdi inguru ematen dira, eta horrek esan nahi du Oiartzunen, gutxi gora behera, urtean, 3,5 geldialdi gerta daitezkeela. Hau da, Ibargurenen arabera, datuek esaten dute geldialdi horien %70 norberaren etxean izaten direla. “Datu hauek guztiak bilduta eta jakinda anbulantzia batek hamar minutu beharko dituela gutxi gora behera iristeko, eta hamar minutu inork ezer egin gabe denbora asko denez, pentsatu genuen hau dena herritarrei kontatu eta erakutsi behar geniela. Saltsa honetan sartu garenok auzolanean, zaintzan eta zaintza sareetan sinesten dugu. Motibatu egiten gaitu honek”.
Ibargurenek esan du Oiartzungo Udalak beti sinistu izan duela proiektu honetan, eta udala prest egonez gero, Bizi-lagunekoak ere prest daudela beste pausu batzuk aztertu eta emateko.
