Zerga ordenantza eguneratzea eta kale garbiketa zerbitzua kontratatzeko baldintzak onartu dituzte
Lezoko Udalbatzarrak ohiko bilkura egin zuen joan den ostegunean. Bost erabaki hartu zituzten.
Lezoko Udalbatzarrak ohiko bilkura egin zuen joan den ostegunean. Eztabaidatutako gai nagusia zergen ordenantza eta kale garbiketa zerbitzuaren kontratazioa izan ziren.
Azken honi dagokionez, kale garbiketaren zerbitzua kontratatzeko 650.000 euro inguruko gastua aurreikusi du udalbatzak, eta zenbait moldaketa egin dituzte, besteak beste, eremuak moldatuz edo maiztasunak handituz.
Bestalde, zergen ordenantzari dagokionez, Iker Salaberria zinegotziak aipatu zuen tresna horren helburuak “behinenak aberastasunaren birbanaketa justua egitea” izan behar duela. Eta birbanaketa hori garatzeko, “bi printzipio gidari” aipatu zituen: batetik, “gehiago dutenei gehiago kobratzea”; eta bestetik, “herritar guztiei oinarrizko ondasun eta zerbitzu publikoak eskaintzeko beharrezko diru sarrerak eskuratzea”.
Bi printzipio horien aterkipean, bost erabaki nagusi hartu zituen udalbatzak, honakoak:
- Zerga eta tasen %1,5eko igoera orokorra.
- Iaz martxan jarritako errenta mailaren araberako hobari sistema sakondu eta zabaltzea, “zerga igoerek guztiei berdin ez eragiteko” asmoz.
- Etxe hutsek OHZn %100eko errekargua jasoko dute, “etxe horiek eskuragarri jartzea bultzatzeko” asmoz.
- Kiroldegiko tasak igotzea, “kiroldegiak udalari eragiten dion zama ekonomikoa arintzeko”. Azken urteetan kiroldegiak udalari 600.000 euroko “zuloa” eragin diola aipatu zuten. Orain, lehiaketa berri bat antolatu behar dela diote “epe motzean”, lehiaketa horretako baldintzak zehazteko eta “udalaren zama arintzeko unea” baita udal gobernuaren ustez.
- Hondakinen kudeaketa ez dadin defizitarioa izan, tasak igoko dituzte (%50eko igoera proposatzen da) “legez behartuta” baitago udala. Dena den zailtasunak dituzten familiek laguntza ekonomikoa jaso ahal izango dute.
Osteguneko bilkura eztabaidatutako eta adostutakoaren gaineko informazio eta xehetasun gehiago lotura honetan kontsulta daiteke.
