Klima eta Energia Planari hasierako onarpena eman diote
2025eko zerga ordenantzak eta udalean euskararen erabilera normalizatzeko plan berriak ere aurrera egin dute udalbatzarrean.
Ikasturte berriko lehen udal osoko bilkura mamitsua izan dela adierazi dute udaletik, bi plan estrategiko eta zerga ordenantza berria behin behinean onartu baitzituzten hautetsiek. EH Bildu eta EAJ-PNVko zinegotzien aldeko botoarekin atera ziren aurrera bi planak behin-behinean, eta alegazioak jasotzeko epea ireki dute orain.
Oiartzungo Klima eta Energia plana da onartutako lehena, eta Oiartzungo trantsizio ekologikoa hauspotzea du helburu: Energia-eraginkortasuna sustatu; berotegi efektuko gasak arindu; etxebizitza, ekonomia jarduera, mugikortasuna eta lehen sektore eta elikaduran energia aurreztu, autokontsumorako energia berriztagarrien erabilera bultzatu eta udal ekipamenduen energia-eraginkortasuna eta aurrezpena bilatu nahi ditu. “Energia trantsizioan eredugarri izan nahi du udalak, eta bide honetan Oiartzungo sektore ezberdinen bidelagun izan”, dio prentsa oharrak. Datozen lau urteetarako helburu eta ekintza berriak jaso dituzte.
Bigarrena, udalean Euskararen Erabilera Nomalizatzeko plana da, eta 2023-2027 eperako egin dute. 1990ean osatu zuten lehen plangintza, eta ordutik “bide garrantzitsua egin da udalaren funtzionamendua euskaraz izan dadin “.
Kohesio sozialerako zerga ordenantza berria
2025. urterako zerga ordenantza berria ere onartu zuten EH Bilduko hautetsien babesarekin. Oro har, KPIa igoko dena baino gutxiago igoko dituzte udal zergak eta tasak aurten ere: %2. Hobariak eta salbuespenak ere egongo dira, eta lanketa berezia egin dute aurten zerga ordenantza berria osatzeko eta Aztiker enpresari herriko ikerketa sozioekonomikoa egiteko eskatu diote. Oihana Irastorza Ogasun Zinegotziak azaldu duenez, Oiartzungo errealitate sozioekonomikoa oinarri hartuta, Udalarentzat estrategikoak diren helburuak lortzeko egokitu dute ordenantza: herrian kohesio soziala indartzeko eta errenta baxueneko bizikidetza unitateak laguntzeko; trantsizio ekosoziala bultzatzeko eta etxebizitza hutsak merkaturatzeko. Orian arte zeuden neurri eta hobariak indartu eta berriak proposatu dituzte.
Bestalde, hondakinen tasa hilean 4 € igotzea onartu dute, hondakin eta lurzoru kutsatuari buruzko Europako legedi berrira egokitu behar baitu Oiartzungo Udalak. Araudi berriak zehazten du herriek hondakinen kudeaketa zerbitzuei lotutako tasa sistema ez-defizitario bat garatu beharko dutela, eta beraz, hondakinen tasek erabat estali behar dituztela hondakin horien kudeaketa gastuak.
