Neguko Solstizio Eguna prestatzeko lehen bilera, ostiralean
Antolaketan parte hartu nahi duten elkarte eta norbanakoak bat egitera deitu dituzte antolatzaileek.
San Tomas eguna. Barazkiak eta jendea Agirre Lehendakariaren plazan azoka egunean. Neguko solstizioa-San Tomas batzordeko kideak lanean hasiak dira jada. Norbanako zein elkarteek osatzen dute batzorde hori, eta jarri dute dagoeneko lehenengo bilerarako hitzordua: hilaren 4an, ostiralarekin izango da 19:00etan Reina aretoan. Irekia da ekarpena egin eta jaiaren antolaketan parte hartu nahi duen ororentzat, eta horrenbestez, bat egitera animatu dituzte herritar eta elkarteak.
Txistorra postuen gaineko jakinarazpena ere egin dute. Abenduaren 21ean txistorra postuak jarri nahi dituztenek, gaurtik hasita eta hilaren 14a arte dute horien eskaera egiteko aukera. Horretarako, Zu! Zure Udala arreta zerbitzuan (udalean zein Aladakoenea eraikinean) aurkeztu beharko dituzte eskaerak dagokion eskaera eredua egoki beteta. Orri eredu horiek Zu! arreta zerbitzuan bertan edo online eskuratu ahalko dituzte (egin klik hemen). Tramitazio osoa, udalaren webgunearen bidez ere egin daiteke.
Gogorarazpena egin die batzordeak, bestalde: Txistorra postua jartzen duten elkarteek antolaketan parte hartu behar dute, eta aurretik aipatutako bilerara bertaratu beharko dute. gainontzeko herritar eta elkarteei ere gonbita egin diete, “Neguko solstizioa-San Tomas eguna aurrera atera ahal izateko antolaketa lanetan, elkarlanean, eta giro paregabean parte hartzera”.
