Trintxerpe Atletikok 25 bizikleta eman ditu dohaintzan
Recicletak egitasmoaren barruan, udal biltegiko bizikletak konpondu eta beharra dutenei ematen hasi dira. Beste 25 bizikleta emango dituzte aurki.
Trintxerpe Atletiko Elkartea egitasmo polit eta solidario batean murgildu da. Recicletak izeneko, udaleko biltegiko 25 bizikleta konpondu eta dohaintzan eman berri ditu. Bizikleta hauek “hainbat petsonen mugikortasuna hobetzeko oso erabilgarriak” izango direla diote taldekoek, “batez ere gizarte bazterketa jasateko arriskuan daudenentzat”. Udalaren eta Ortzadar Ikastetxearen babesa jaso du egitasmoak eta zenbait herritarrek ere bat egin dute proiektuarekin, bizikletak emanez.
Recicletak-en helburu nagusia “abandonatuta dauden eta udal gordailuan dauden bizikletak eta dohaintza partikularrak erreskatatzea eta berrerabiltzea” da. Bizikleta horiek konpondu eta egokitu egiten dira, gerora beharra duten pasaitarrei emateko. Bizikleta mugikortasuna sustatzeaz gain, proiektuak erabiltzen ez diren bizikletak “berreskuratzeko, berrerabiltzeko eta baloratzeko sistema sozial bat” ezarri nahi du. Aldi berean, komunitatearen arteko elkartasuna sustatzea ere badute asmo.
25 bizikleta entregatu dituzte jada, eta aurki beste 25 jasoko dituzte zenbait herritarrek, 50 izanik guztira.
Trintxerpe Atletiko Klubak 30 urte baino gehiago daramatza “Pasaian bizikleta bidezko mugikortasuna sustatzen, filosofia jasangarri sendoko proiektuak garatzen eta bi gurpileko garraiobide bikain hau erabiltzen duten pertsona guztien alde lan egiten”.
Dohaintzaren bat egin nahi dutenei haiekin harremanetan jartzeko deia egin diete. Helbide honetara idatzi 670 63 55 52 telefono hots egin daiteke.
