2025erako zerga ordenantza berriak adostu ditu Oiartzungo Udalak
Fiskalitate justuagoa lortzeko pizgarri eta hobari gehigarriak onartu dituzte. Aztikerrek Oiartzungo egoera sozio ekonomikoa aztertu du.
Zerga ordenantza berriak adostu ditu Oiartzungo Udalak, gizarte babesa indartu eta trantsizio ekologikoa hauspotzeko “neurri garrantzitsuekin”, eta Joana Mendiburu alkateak azaldu duenez, urtero onartu ohi diren zerga ordenantzak goitik behera aztertu dituzte aurten.
Oiartzungo egoera sozio-ekonomikoaren azterketa egiteko eskatu zion Udalak Aztiker enpresari, eta emaitzak oinarri hartuta prestatu dute zerga ordenantza berria.
Gizarte kohesiorako hobariak
%2an eguneratuko dituzte zergak eta tasak, KPIaren igoeraren azpitik, herritarren ekonomian ahalik eta gutxien eragiteko. “Jakitun gara herritarrok eroste ahalmena galdu dugula eta asko garestitu zaigula bizitza denoi. Horregatik, udal zerbitzuen gastuen igoeraren zati handi bat bere gain hartzen jarraituko du Udalak”, adierazi du Mendiburuk.
Diru-sarrera kopuruaren arabera zehaztu dituzte ordaindu beharreko tasak eta zergak, eta errenta gutxiko familiak laguntzeko neurri ezberdinak jaso dituzte; ez dute uraren eta hondakinen tasa ordaindu beharko, eta udako igerilekua doan izateaz gain, kiroldegian prezio murriztua izango dute.
Zahartze aktiboa sustatzeko neurriak ere hartu dituzte. Zehaztu dutenez, hogei urtean ia hamar puntu igo da 65 urtetik gora dituen oiartzuarren kopurua. Horregatik, eta ariketa fisikoa egiteak dituen onurez jakitun, 65 urtetik gorako pertsonentzat kiroldegiko prezio murriztu berri bat proposatu dute (15,14€ hilean).
Trantsizio ekologikorako neurriak
Klima-aldaketaren aurkako borrokaren premiaz jabetuta, udalak hobariak eta murrizketa fiskalak ezarri ditu energia kontsumoa gutxitzeko edo mugikortasun jasangarriagoaren aldeko apustua egiten duten oiartzuarrentzat.
Besteak beste, eguzki panelak jartzen dituzten etxeek %50eko hobaria izango dute Ondasun Higiezinen Gaineko zergan (IBIan), eta %95ekoa obra hauek egiteko tasan. A eta B energia-efizientzia lortzeko eraikuntza, instalazio edo obretan ere %95 bitarteko hobariak aurreikusi dituzte. Mugikortasunari dagokionean, etxebizitza komunitateetan bizikletak aparkatzeko guneak sortzeko obren tasaren %5 bakarrik ordaindu beharko dute, eta ibilgailuen CO2 isurien arabera graduatu dituzte trakzio mekanikoen zergako salbuespenak.
Ehun ekonomikoa babesteko, erabakiak
Tokiko ekonomia sustatzeko hainbat pizgarri ere txertatu dituzte ordenantzetan. Kontratu mugagabeak egiten dituzten enpresek hobariak izaten jarraituko dute Jarduera Ekonomikoaren Gaineko Zergan. Oiartzunen dauden etxe hutsak alokairu sozialera bideratzea lortu nahi du udalak, eta horretarako neurriak ere hartu dituzte: etxebizitza hutsei IBIan ezartzen zaien gainkargua %75etik %100era pasako dute, eta etxe hauek Bizigune edo ASAP programen bidez alokairura bideratzen badira %50eko hobaria izango dute zergan.
Hondakinen tasa, gora
Europako hondakinen lege berriak herriei hainbat baldintza exijitzen dizkie, bai birziklatze-kopuruei dagokienez baita aurrekontuari begira ere. “Oiartzunen birziklatze-tasa oso txukunak ditugu eta aspalditik gaude Europak eskatzen duen %70eko birziklatze tasatik gora”. Dena den, alkateak azaldu duenez, aurrekontuan doikuntzak egin beharko dituzte datozen urteetan. “Orain arte udal aurrekontutik osatzen zen hondakinen kudeaketarako beharrezko dirua. Aurrerantzean legeak ez digu hori egiten utziko eta hondakinen bilketa eta tratamenduaren gastu guztia hondakinen tasarekin ordaindu beharko da”. Hala, 168 euroko tasa izango da urtean (hilean 4 € gehiago). Ordainketa errazteko, bi zatitan ordaindu beharrean hirutan egitea erabaki dute.
