"Euskaraz hitz egin, gozatzeko eta hobetzeko", badator Mintzalaguna
Hirugarren ikasturterako dena prest dute antolatzaileek. Aurten "bultzada berri bat" eman nahi izan diote.
Mintzalaguna egitasmoa bueltan da, aurtengo ikasturtean parte hartzeko matrikulazio kanpaina zabalik dela jakinarazi dute Pasaiako Udalak, Udal Euskaltegiak eta Txirria-AEK Euskaltegiak. Laura Ré Euskara zinegotziak hirugarren urte honen gaineko xehetasunak eman ditu. Aurreko bi urteetako esperientziak “arrakastatsuak” izan zirela dio, eta hori dela eta, aurten “bultzada berri bat” eman nahi izan diotela udaletik “eskaintza hau egonkortzeko” asmoz.
Iaz 80 pasaitar inguru aritu ziren astero talde txikitan euskara praktikatzen. Hirugarren honetan, gainera, lau barrutietara iritsiko da egitasmoa, eta “euskaraz hitz egiteko, gozatzeko eta hobetzeko aukera paregabea” dela nabarmendu nahi izan du zinegotziak. Egitasmoan parte hartzea doakoa dela gogorarazi du, eta oroitarazi du ordutegietan “malgutasun handia” eskaintzen dutela.
Aurten ere Bidelagunak behar dituzte. Bere burua eskaintzen duen pertsona izango da hori, euskaraz aritzen ohituta dagoena. Iaz 19 lagunek izan zuten paper hori, eta euren ekarpena “ezinbestekoa” dela gaineratu du Rék. “Bidelaguna ez da irakasle bat, euskaraz eroso hitz egiten laguntzen duen kide bat baizik”, erantsi du.
Bidelaria berriz, bere euskara maila hobetu nahi duen pasaitarra izango da. Ez dute zertan euskaltegietako ikasle izan beharrik, edozeinek parte har dezake.
Saioetatik harago, kanpoko ekintzak ere izango dira ikasturte berri honetan, “funtsezko osagarri” baitira antolatzaileentzat. Txangoak, irteerak, ikastaroak, hitzaldiak… Denetik izango da aurten ere.
Gurasolagun
Aurten ere Gurasolagun taldeak izango dira. Gurasoak eta haurrak elkartzen dira talde horietan, “laguntza behar duten gurasoek euskararen erabilera normalizatu ahal izan dezaten eta umeek helduen arteko harremanetan euskara erabiltzen dela ikusteko”. Trintxerpen talde bat sortzeko saiakera berezia egingo dute aurten.
Gazte taldeak (Gaztelagun izenekoak) sortzeko asmoa ere badute aurten, hori izango da erronka nagusietako bat. Bi gazte talde sortu nahi dituzte antolatzaileek, zinegotziaren arabera, pasaian zenbait gaztek ez baitute eta euskara egoera informaletan erabiltzeko aukerarik”.
Izena emateko Pasaiako bi euskaltegietara jo dezakete zuzenean, edo bestela, 688 64 71 59 telefonora deituta edo helbide honetara idatzita matrikula daitezke interesdunak.
