Oiartzungo Sortuk elkartasuna adierazi dio Joanes Larretxeari
Gaur (hilak 7) epaiketa izango du Madrilen Joanes Larretxeak, eta Oiartzungo Sortuk elkartasuna adierazi nahi dio Larretxeari eta haren senide zein gertukoei.
Joanes Larretxea, euskal presoen etxeratzearen aldeko ekitaldi batean. Joanes Larretxeak epaiketa izango du gaur (hilak 7) Madrilen, eta Oiartzungo Sortuk elkartasuna adierazi nahi izan dio berari eta haren senide zein gertukoei.
Horrela dio Sorturen oharrak: “Azpimarratu nahi dugu Euskal Herrian gatazka politikoaren konponbiderantz urratsak eman behar ditugula eta horrelako epaiketek ez dutela inolako lekurik, aitzitik, oztopo bat baino ez dira. Euskal preso, iheslari eta deportatu politikoen aferari behin betiko konponbidea emateko garaia da. Horretarako, etxeratzeko bidean oztopo diren salbuespeneko legediaren eta salbuespeneko erabaki juridikoen eragina indargabetzeko unea da”.
Ildo beretik jarraituz, gogorarazi nahi izan dute Larretxeak hilaren 11n espetxean hamabost urte beteko dituela. “Frantzian betetako 6 urteak aintzat hartuta eta 2003an euskal presoei espresuki aplikatzeko sortutako salbuespen legedia gaindituz gero, 3. gradura igarotzeko eskaera egiteko moduan egongo litzateke”.
Joanes eta euskal preso politiko guztien etxerako bidean aurrera urratsak ematea eta oztopo baino ez diren epaiketak bertan behera uztea eskatu dute.
