Jokin Oregiren 'Arima eta bihotza' irabazle, eta denak pozik
Larunbatean egin zen Lezoko II. Irakurketa Dramatizatuen Partida. Arte-eszenikoen festa izan zen, jendetsua, umorez betea.
Arte eszenikoak irabazle Lezon beste behin. Larunbatean egin zen Lezoko II. Irakurketa Dramatizatuen Partida, hau da, Lezoko Antzerki Testu Laburren II Lehiaketan finalista izan diren lanen erakusketa publikoa, eta bozketa. Sei lan finalista, sei sortzaileren lanak, beraz, sei emanaldi aktore profesional zein amateurrek eginak, zuzendari entzutetsuen gidaritzapean horiek. Denen artean irabazle, publikoak hala erabakita, Jokin Oregiren Arima eta bihotza lana. Oregiren lanaz gain, Ainhoa Mariezkurrena sanjuandarrak, Hegoa Alvarezek, Galder Perezek, Goiz Eder Iturainek eta Pedro Jose Zabalzak egindakoak ere antzeztu zituzten. Mikel Arruti alkatearen eskutik eman zioten Oregiren anaiari saria; txapeldunak ez zuen Lezon egoterik izan larunbatean. Ainhoa Artetxe eta Edurne Agirrezabala aktoreak izan ziren Oregiren lanari bizia emateaz arduratu ziren antzezleak; haiek zuzentzen Amancay Gaztañaga izan zen.
Arrakastatsua. Halakoa izan zen larunbateko partida sorta. Arrats perfektua kale giroan antzerki pilula laburrez gozatzeko. Herri Eskolako jolastoki estalian 200dik gora lagun bildu ziren sei antzerki piezataz, nahiz bestelako musika emanaldi eta ikuskizunetaz gozatzeko. Denaren balorazio oso ona egin dute antolatzaileek. Dena atsegin, umoretsu, giro onean, kulturaren goxotasunean. Foodtruck jakien zerbitzuarekin ere, denak gustura. Bai antolatzaileak, publikoa, eta bereziki Jokin Oregi, pozik. Lehiaketaren eta beraz hirugarren partidaren zain dira jada Lezon. Lezoko Udalak eta Hika Teatroa konpainiak antolatu dute aurtengo ekitaldia.
Jarraian, larunbat arratsaren hainbat une ikusteko aukera Mendi Urruzunok ateratako argazkiei esker, Lezoko Udalaren eta Hika Teatroren bidez HITZAk jasotakoak.
