Trintxerpeko Bita eraikinak nazioarteko aitortza jaso du
Docomomo arkitektura elkartearen 2.461. plaka jarri zuten atzo, Fausto Gaiztarro arkitektoaren senidez eta herritarrez inguraturik.
Beatriz Gaiztarro, Fausto Gaiztarroren alaba, ordezkariekin. Trintxepeko Bita eraikin enblematikoak Docomomo nazioarteko arkitektura elkartearen aitortza jaso berri du. Atzoko Arkitekturaren Nazioarteko Egunean jaso zuen eraikin enblematikoak aitortza. Docomomo elkartearen plaka jarri zuten eraikinaren atarian, elkarteak jarri duen 2.461.ena izan da. Azken honekin, hiru dira Pasaian aitortza hori jaso dutenak: Bita, Javier Markinaren Transatlantico eraikina eta Jose Maria Iturriagaren Madre Pilar Izquierdo haurtzaindegia.
1946-1947 urteen artean eraiki zuten Bita, Fausto Gaiztarro arkitektoaren eskutik. Industria eraikuntza hau merkatu, biltegi eta arrantza sareak tindatu eta lehortzeko espazio gisa erabili zen urte luzez (horregatik La Rederia izenagatik ere ezaguna izan da). Arrantza jardueraren gainbehera iritsi zenean eta nylonezko sareak erabiltzen hasi zirenean eraikuntza horren erabilera aldatu egin zen eta bulego eraikin bilakatu zuten, gaur egun duen itxura berberarekin.
Juana Otxoa-Errarte, Gipuzkoako EHAEOko presidentea, Iraitz Pazo eta Aitor Brion ziengotziak eta Fausto Gaiztarroren senideak atzoko aitortza ekitaldian izan ziren, eta haiekin batera, besteak beste, Beatriz Gaiztarro izan zen, arkitektoaren alaba. Ezekiel Collantes arkitekto doktorearekin bisita gidatu interesgarria egin zuten hala nahi izan zuten pasaitarrek, hitzaldi eta guzti. Adinkide elkarteko emakume talde batek performance berezia egin zuen eraikinaren atarian, ehuntze lanak metafora bilakatuz.
Pazosek nabarmendu zuen arkitektura ez dela “azpiegiturak eraikitzea bakarrik”: “Ez da soilik zementua. Gure herriak osatzen dituzten eraikinak eta espazioak historiaren lekuko isilak dira, gure balioak islatzen dituzte, eta gure ingurunearekin dugun harremana baldintzatzen dute. Gaur ondare arkitektonikoaren kontserbazioarekin dugun konpromisoa berresten ari gara, baina baita etorkizunari begira ere. Hirigintza modernoak oreka bilatu behar baitu memoria historikoaren eta egungo hiriaren beharren artean”.
Brionek, bestalde, atzo jarritako plakak, Gaiztarroren lana balioan jartzeaz gainera, “ondareak gure komunitateen bizitzan duen garrantziaz hausnartzera gonbidatzen gaituela” esan zuen: “Ondare kulturala erakin edo monumentu multzo bat baino askoz gehiago da. Gure tradizioak, oroimena eta etorkizuna lotzen dituen haria da”.
Jarraian, atzoko ekitaldian ateratako zenbait argazki:
