Ziriza eraikina, udalarena
Udalaren titulartasunera pasatu da eraikin enblematikoa, PPAren eta udalaren arteko akordioaren ondorioz. Kultur helburu eta jardueretarako baliatu ahal izango du aurrerantzean.
Zirika eraikina Pasaiako Udalarena izatera pasa da, Pasaiako Portu Agintaritzak eta udalak Trintxerpen aurki daitekeen eraikina udal titulartasunera pasatzeko akordioa sinatu berri baitute. Joakin Telleria PPPko presidenteak, Teo Alberro alkateak eta Francisco Javier Herrero Aparicio Ekonomia eta Ogasuneko Gipuzkoako ordezkariak hitzarmena sinatu dute gaur goizean.
Akordio honi esker, kultur helburu eta jardueretarako baliatu ahal izango du eraikina udalak aurrerantzean, hiru ordezkarien arabera, “azpiegitura enblematiko baten titulartasuna bere gain hartzeaz gain, pasaitarrentzat aukera berriei atea irekiz”. Alkatearentzat akordio hau “urrats erabakigarria da Pasaiarentzat portu hiri integrazioan, eta bereziki Trintxerperentzat”. Ziriza “gune historikoa” dela gaineratu du Alberrok, eta “udal kudeaketapean eta gizarte eragileen lidergoarekin, tokiko eragile soziokultural berria” izango dela esan du.
Telleria ere pozik agertu da akordioarekin, eta aipatu du baliagarria izango dela “gure inguruko udalerriekiko harremanak sendotzeko, badia biziberritzeko eta pasaitarren bizitza hobetzen jarraitzeko”.
2021ean akordio batera heldu zen udala portuko agintaritzarekin, orduan abiatu zituzten eraikinaren lagapenerako tramite administratiboak. Hiru ordezkarien arabera, sinadura honek orduan hartutako erabakian “beste mugarri bat” ekarri du “erabilera publikorako irekitako edo udal ekipamenduetarako diren hamar higiezin lagatzea ahalbidetzeko hainbat formula ezartzeko”. Hala, Jose Antonio Santano Garraioen eta Mugikortasun Iraunkorraren Estatu idazkariak otsailean hartutako konpromisoa bete da.
Lagapen hau Trintxerperentzat “benetako eraldaketa aukera” dela gaineratu du alkateak, eta horri esker Herrera eraldatzeko prozesuarekin jarrai daitekeela. Orain, eraikinaren izaera eta erabilerak bizilagunekin batera definitu nahi ditu udalak, eta diseinuan eta garapenean barrutiko eragile soziokulturalek “funtsezko zeregina” izango dutela.
