Aste honetan hasiko ditu entrenamenduak Oreretako Rugby Taldeak
Denboraldi berrirako erronkak ongi zehaztuta hasiko du ikasturte berria Orereta Rugby Taldeak. Gazte taldea egonkortu eta errugbia sustatzeko ekintzak antolatzea izango ditu helburu behinenak aste honetan bertan hasiko duen ikasturte berrian.
Melea, Arrasate-Soragazteak vs Txingudi-Orereta partidan: Argazkia: Paulo Coto Oarsoaldeko errugbi taldeak hasitako bidean urratsak egiten jarraitzen du, eta denboraldi berrirako erronkak ongi zehaztuta hasiko du ikasturte berria. Gazte taldea egonkortu eta errugbia sustatzeko ekintzak antolatzea izango ditu helburu behinenak aste honetan bertan hasiko duen ikasturte berrian.
Horretarako, errugbi saio irekia antolatu dute udalerrian eta orain arte egin izan ohi duen bezala, bi talde antolatu ditu oraingoan ere. 8 eta 14 urte arteko gaztetxoak bilduko dituen taldearekin igandetan egingo dituzte saioak 12:00etatik 13:30era; 15 urtetik gorakoekin, berriz, astelehenetan entrenatuko du taldeak, 17:00etan hasita. saio guztiak, Mikel Odriozola estadioan egingo dituzte, astero, ekainera arte.
Xabi Sanchez klubaren koordinatzaileak, ateak guzti-guztientzat zabalik daudela nabarmendu du, “berdin-berdin dute lekua errugbia ezagutzen ez duetnek, edota urteak eman dituztenak jokatzen, ateak zabalik ditugu kirol honekin gozatu nahi duten guztientzat”.
Informazio gehiago, taldearekin harremanetan jarrita eskura daiteke. Horretarako hainbat bide dituzte: 688 69 63 03 telefono zenbakira deituta, posta elektronikora mezua bidalita (klik hemen) edo sare sozialen bidez.
Txingudi Rugby taldearekin harremana sendotu
Aurreko denboraldian entrenatzen aritu diren jokalariek, aste batzuk daramate martxan, eta aurten gainera, Txingudi eta Oreretako errugbi taldeek euren elkarlanean aurrera urratsa egin dutela azaldu du Sanchezek, “Gipuzkoako Federazioak antolatutako txapelketetan, hau da, 14 urtez azpiko liga eta topaketa guztietan, Txingudi-Orereta taldea ariko da.
“Hamar urtez azpikoetatik senior mailara gure proiektuarekin lotutako 15 bat jokalari ari dira gaur egun Txingudin. Abiapuntu sendoa dugu aurten, eta hazten jarraitu nahi dugu”, gaineratu du Sanchezek.
