Azaroan egingo du Familia Lagunak lehen saioa
Hiru ikasturtetan 100 familia baino gehiagok hartu dute parte programan. Udalerrira eta eskoletara iritsi berri diren familiei akonpainamendua eskaintzea du helburu programak, besteak beste.
Familia Laguna Topaketa. Argazkia: Herri Bizia Familia Lagunak programak azaroan hasiko du ikasturte berria, orduan izango du lehen saioa, eta hilaren bukaerara arte dago zabalik izena emateko epea. Programaren bidez iritsi berriak diren familiei ongi etorria egin eta akonpainamendua eskaintzea da helburua, kontuan hartuak sentiaraztea, eta eskola egokitzapenean erraztasunak eskaintzea.
Horrekin batera, Familia Lagunak harremanetan jartzen dituen familia bikoteen bidez, auzo eta ikastetxeetako familien elkar ezagutza, saretzea eta kohesioa lantzen dute, baita kulturarteko bizikidetza eta arrazakeriaren aurkako pedagogia ere. 2021-22 ikasturtean abiatu zuen programa udalak Haur eta Lehen Hezkuntzako ikastetxeetan. Lehenengo ikasturtea Koldo Mitxelena Herri ikastetxean egin zuen bertako guraso elkarteak eskatuta. programak hezkuntza komunitateari zein udalerriko bizikidetzari egin ziezaiokeen ekarpena ikusita Errenteria-Oreretako sei ikastetxeetara zabaltzeko erabakia hartu zuen udalak.
Hiru ikasturte hauetan barrena, 100 familia baino gehiago aritu dira Familia Laguna programaren aterkipean. Tartean, Udalerrira iritsi berriak diren jatorri ezberdinetako familiak, zein horiei akonpainamendua eskaintzeko prest azaldu direnak. Guztira 21 jatorri ezberdinetako familiak zenbatu ditu parte hartu dutenen artean udalak.
Izena emateko aukera urriaren bukaerara arte zabalik, esan moduan, interesdunek ikastetxeko idazkaritzetara jo beharko dute, edota online egin (klik egin hemen).
