Berdintasun Kontseilua sortzeko bidean da Lezo
Parte hartze eta elkarrizketa mahaia nondik norakoak zehazteko lehen bilera hilaren 23an egingo dute, Kultura Aretoan.
Berdintasun Kontseilua izango du Lezok. Berdintasunaren gainean gogoeta egin eta elkarlanerako eta adostasunak bilatzeko espazioa izango da. Hori egikaritzeko urratsak ematen hasiko da Lezoko Udala. Lehena, hilaren 23rako (asteazkena) prestatu du: 18:00etan, Donibane kaleko Kultura Aretoan, batzarra egingo dute parte hartze eta elkarrizketa organuaren nondik norakoak zehazteko.
Zehaztasun gehiago eman ditu udalak. Adierazi du mahairen helburua berdintasunaren alde apustu egiten duten pertsonen eta eragile sozialen sarea sortzeaz gain, emakumeen parte hartzea, ahalduntzea eta protagonismoa sutatzea dela, “emakumeen parte hartze sozial eta politikoaren defizitari aurre egin, eta euren herritartasun aktiboa indartu, eta talde feministen eta emakume taldeen lanaren aitortza egiteko”.
Udalak nabarmendu du Emakumeen eta Gizonen Berdintasunerako eta Emakumeen Aurkako Indarkeria Matxistari Gabe Bizitzeko Legearen oinarrietan dagoela gisa horretako mahaiak sortzea. Lezoko III. Berdintasun Planaren barruan ere dago aurreikusia kontseilua sortzea. Herriko mugimendu feministaren aspaldiko eskaera da, aldi berean.
