2025eko Elorsoro kiroldegiko prezioak zehaztu ditu udalak
Erabiltzaileen adinaren edo errenta mailaren araberako kuotak finkatu dituzte. 65 urtetik gorakoen kuota ohi baino ia %40 merkeagoa da.
2025 urterako Elorsoro kiroldegiko prezioak zehaztu eta erabiltzaileen adinaren edo errenta mailaren arabera kuota ezberdinak finkatu dituzte. Gainera, 65 urte edo gehiago duten bazkideentzat abonu mota berri bat sortu dute, ohiko kuota baino ia %40 merkeagoa dena.
Olaia Lasa Ongizate zinegotziak adierazi duenez, jubilatuek ariketa fisikoa egitea sustatzeko sortu dute abonu berria, zahartze aktiborako eta ongizaterako “ezinbestekoa” baita. “Bidegorri sare zabala eta mendiz inguratutako herria dugun arren, eguraldia ez dugu beti lagun izaten. Gainera, zahartze osasuntsurako garrantzitsuak diren beste zenbait ariketa egiteko aukera ere eskaintzen ditu kiroldegiak: indarra landu eta muskulatura garatzeko gimnasio gela edo igerilekua, kasu”. Elorsoro “harreman sareak indartzeko” topagunea ere badela gaineratu du, eta jubilatuek zerbitzua gehiago erabiltzea bultzatu nahi dutela. Dagoeneko bazkide direnei prezio berria zuzenean aplikatuko zaiela azaldu du Lasak. “Ez dute eskaerarik egin behar, 2025eko urtarrileko kuotan ikusiko dute gutxiago kobratuko zaiela”.
Hauek dira zehaztu dituzten beste abonuak:
- Helduen ohiko kuota (hileko): 24,60 euro.
- 65 urte edo gehiagokoen banakako kuota: 15,14 euro.
- 65 urte edo gehiagoko bikoteen kuota: 24,71 euro.
- Gazteen (6 – 15 urte) banakako kuota: 15,14 euro.
- Familia kuota: 41,25 euro.
- Familia ugaria edo guraso bakarreko kuota: 28,88 euro.
Eskatu daiteke prezio murriztua
Abonu mota horiez gain, ezgaitasuna duten edo egoera ekonomiko zailean dauden bazkideek hobari gehigarriak izango dituzte prezioan, baina eskaera egin beharko da horretarako. Ireki dute eskaera hori egiteko epea, eta azaroaren 10a da azken eguna. Udalean egin behar da eskabidea (kiroldegian ez), online edo udaletxeko sarreran.
Errenta maila baxua duten bazkideek prezio orokorren gainean %40ko hobaria izango dute (hemen ikus daitezke bazkide unitate bakoitzerako zehaztutako mugak).
- Helduen kuota murriztua: 14,77 euro.
- Familien prezio murriztua: 24,71 euro.
- Familia ugarien edo guraso bakarrekoen prezio murriztua: 17,30 euro.
- Gazteen (6 – 15) prezio murriztua: 9,05 euro.
Ezgaitasuna duten bazkideek doan izango dute kuota, baina eskera aurrez aurkeztu behar dute. Gainera, ezgaitasun iraunkorra duten bazkideentzat hobekuntza bat ere gehitu dute: 2025erako eskaeran hala baimentzen badute, aurrerantzean udalak ofizioz onartuko die doako kuota, urtero eskaera berriz aurkezten ibili beharrik gabe.
