Etorkizuneko Gure Zumardia irudikatzeko antxotarrekin bilduko da udala
Datorren astean abiatuko dute parte hartze prozesuaren bilera erronda. Eremua "ahalik eta espazio atseginena, jasangarriena eta herritar guztion beharrak aseko dituena" izatea nahi dute.
Pasai Antxoko Gure Zumardiaren etorkizuna herritarrekin batera diseinatu nahi du udalak, eta horretarako, saio erronda bat abiatuko dute datorren astean. Irekiak izango dira guztiak, gaur Mikel Garcia Peñil alkateordeak, Laura Ré zinegotziak eta Iker Agirre teknikariak jakinarazi dutenez. Prozesuaren nondik norakoak azaldu dituzte.
Herritar eta eragileen iritziak eta ekarpenak jaso nahi dituztela esan du alkateordeak: “Topoa lurperatzeko obraren ondorioz, Gure Zumardia berrantolatzeko proiektua aurrera eraman nahi dugu ETSrekin elkarlanean. Elkarrekin antxotarrok ditugun beharrak aseko dituen espazio berri bat pentsatu nahi dugu”.
Parte hartze prozesu honekin, Rék esan bezala, “etorkizuneko Gure Zumardia ahalik eta espazio atseginena, jasangarriena eta herritar guztion beharrak aseko dituena izatea” nahi dute.
Saioak
Lehen saioan adinekoekin bilduko dira udal ordezkariak, ostegunean (hilak 17), 11:30ean, Antxoko Kultur Etxean. Kolektibo honekin bi norabidetan ariko dira: “memoria historikoa zaindu eta barrutiko bizimodua jasotzeko” batetik, eta “adin talde honen behar espezifikoak landu eta espazio inklusiboa izan dadin” bestetik.
Bigarren bilkuran barrutiko emakumeekin bilduko dira. Hilaren 24an izango da, 18:00etan, Bekoz Bekoren lokalean.
Hirugarrena nerabeei zuzendutakoa izango da. Hilaren 25an egingo dute, 17:00etan, Antxoko Kultur Etxean. Hauekin bi ikuspegitik egingo dute lan: barrutiarekiko atxikimendua eta kolektiboaren errealitatera egokitutako espazioaren diseinua landuko dituzte.
Hiru saio hauen ondoren, herritar guztiei begirako batzar bat egingo dute, irekia ere. Abenduan izango dela aurreratu dute hiru ordezkariek.
Saio guztietan jasotakoarekin proposamen berriaren zirriborroa egingo du udalak eta deboluzio saio irekia egingo dute urtarrilean. Orduan aurkeztuko dute proposamena. Hori ETSri helaraziko diote gero, eta “dena ondo bidean”, 2025ko abendurako obra bukatuta egon daitekeela esan du alkateordeak.
Saioen berri emateko kaleratu duten kartelaren iruditeria nondik datorren ere azaldu dute. “Bihotza irudikatu izanak bizitza, komunitatea eta Antxoren motorra dena sinbolizatu nahi izan dugu, horrela ulertzen baitugu antxotarrok Gure Zumardia”.
Gaurko agerraldia bukatzeko, hiru ordezkariek antxotarrrak bileratara gonbidatu dituzte, “edozein dela ere euren adina, jatorria edota interesa”.
