Bi film grabatuko dituzte Donibanen datozen egunetan
'Desagertuta' eta 'Ultramarino' filmen grabaketek trafikoan eragina izango dutela jakinarazi du Pasaiako Udalak.
Pasai Donibanek beste bi filmen grabaketak jasoko ditu datozen egunetan. Udalak jakinarazi duenez, bihartik (hilak 15) ostiralera bitarte (hilak 18) Desagertuta eta Ultramarino filmen barruko grabaketak izango dira barrutian, eta biek eragina izango dute trafikoan.
Desagertuta filmaren errodaje gunea Juan XXIII kalean egongo da, eta hortaz, bertara sartzeko oinezkoen zirkulazioa kontrolatu eta desbideratuko dute. Dena den, jubilatuen etxera joateko aukera izango da uneoro. Horrez gain, kale honetan trafikoa aldizka moztuko dutela aurreratu dute, 12:00etatik 22:00etara. Zenbait aparkaleku ezingo dira erabili.
Bestalde, Ultramarino filma asteazkenetik ostiralera bitarte grabatuko dute. Hiru egun hauetan Bonantza pasealekuan, zuzien jaitsieran eta Donibane kalean oinezkoen zirkulazioa kontrolatu eta desbideratuko dute, bertan izango baitute errodaje gunea. Ibilgailuen zirkulazioa ere tarteka moztuko dutela jakinarazi du udalak. Mozketak “ahalik eta laburrenak” izango dira, “pertsonen eta ibilgailuen joan-etorriak bermatzeko”.
Mozketak izan arren, osasun baliabideek eta larrialdietarako ibilgailuek uneoro sartzeko aukera izango dute.
