Gizon bat atxilotu dute pertsonen salerosketaren kontrako operazio batean
Sexu esplotaziorako gizakien salerosketa egotzita egin du atxiloketa Ertzaintzak. Errenteriako gizonaz gain, beste bi emakume ere atxilotu ditu, Donostian eta Gasteizen.
Operazioaren barruan egindako miaketetako baten irudia. Argazkia: Segurtasun Saila Hiru pertsona atxilotu ditu Ertzaintzak sexu esplotaziorako gizakien salerosketaren aurka egindako operazio baten barruan, horietako bat, gizona, Errenteria-Oreretan. Beste biak, berriz, emakumeak, Gasteiz eta Donostian atxilotu ditu. Operazio horretan bertan, prostituzioan aritzera behartzen zituzten lau emakume askatu ditu, gainera, Eusko Jaurlaritzaren Segurtasun Sailak emandako informazioaren arabera.
Iturri berek zehaztu dutenez Arabako Instrukzioko 1 zenbakiko epaitegiak zuzendu ikerketa. Joan den apirilean abiatu zuten ikerketa hori, zenbait emakume prostituzioan aritzera behartzen zituztela pisuetan edo jai probatuetarako irteeretan jakin zuenean Ertzaintzak. Operatibo horren testuinguruan egin zituen atzo hiru atxiloketa horiek.
Biktimek salatu dutenez, orain desegindako taldeko buruek dokumentazioa eta zerbitzuetatik lortzen zuten dirua atxikitzen zieten, eta irteerak mugatzen zizkieten, egunean gehienez bi ordura. Operatiboaren barruan, Gasteizko bi etxebizitza eta ile-apaindegi batean, eta Donostiako etxebizitza eta lonja batean miaketak egin ditu Ertzaintzak, halaber, “ageriak, ordenagailuak, datafonoak, dirua eta droga kopuru txiki bat antzeman da”, zehaztu du Segurtasun Sailak.
Sexu esplotaziorako atxikita zituzten emakumeak Donostia eta Gasteizko etxebizitzetako erregistroan egin ondotik askatu dituzte. Emakunderekin itundutako GKE Gobernuz Kanpoko Erakundeek artatu dituzte, Emakundek sexu esplotaziorako salerosketen biktimei arreta emateko duen protokoloaren barruan.
Atxilotuak Ertzain etxera eraman zituzten, beharrezko eginbideak egiteko eta bukatutakoan epailearen esku utziko dituzte.
