'La Frontera' telesailaren filmaketarengatik, trafiko aldaketak Beraunen
Trafiko aldaketa horiek bihar—urriak 16— eta ostegunean egingo dituzte Beraungo hainbat kaletan. Aparkaleku alternatiboa egokituko dute Pablo Sorozabal plazan.
Aparkalekuak balizatuta. Argazkia: Herri Bizia Trafikoan aldaketak eragingo ditu La Frontera filmaren grabaketak bihar, asteazkena, eta etzi Berungo hainbat kaletan. Aparkaleku batzuk kenduko dira, eta eragina arintzeko, Pablo Sorozabal plaza aparkaleku gisa erabili ahalko da bi egun horietan. Ibilgailuentzako sarrera Jose Maria Usandizaga kaletik izango da eta gaur—asteartea—19:00etatik hilaren 17ko 19::00etara izango da zabalik.
Ibilgailurik ezingo da egon bihar goizeko 07::00etatik osteguneko 19:00eak arte ondoko kale hauetan: Aita Donostia, Norberto Almadoz kaletik Aita Donostia supermerkatuaren pareraino; Norberto Almandoz kalea, Juan Crisostomo Arriaga eta Maurice Ravel kaleen artean; eta, Maurice Ravel kalean, Lanbideren aurreko bi espaloiak, Kutxabank aurreko aparkaleku batzuk, eta Monroy plazara igotzeko eskaileren aurreko aparkaleku batzuk.
Trafiko mozketak ere egingo dituzte. Hala, Aita Donostia kalea itxita egongo da ibilgailuentzat bihar 08:15etik 18:15era, eta ostegunean 08:00etatik 19:00etara Norberto Almandoz kaletik Aita Donostia supermerkatuaren pareraino. Ibilbide alternatiboa Juan Crisostomo Arriaga, Norberto Almandoz, Galtzaraborda etorbidea eta Maurice Ravel kaleak izango dira. Halaber, aldizkako mozketak egongo dira oinezkoentzat, errodajeak eragindako zenbait tokitan.
