"Jendeak eskertu egin du Oiartzunen horrelako ekitaldi bat egitea"
Haurdunaldiko, Erdiondoko eta Jaioberrien Heriotzen Dolua Ikusgai Egiteko Mundu Eguna zen atzo. Egoera berdinean dauden edo bizi izan duten familiei babesa erakusteko, argazkia atera zuten.
Haurdunaldiko, Erdiondoko eta Jaioberrien Heriotzen Dolua Ikusgai Egiteko Mundu Eguna zen atzo (hilak 15), eta egoera berdinean dauden edo inoiz egoera hori bizi izan duten familiei babesa erakusteko, herri mailako argazkia atera zuten Oiartzunen.
Aitziber Araolazak eta Maddalen Iriondok egin zuten argazkirako deia, eta azaldu dutenez jendeak asko eskertu du gaiaz hitz egitea. “Jende asko gerturatu zaigu eskerrak ematen hitz egiteagatik, eta beraien esperientzia ere kontatu digute “.
Araolazak argazkia jendetsua izan zela azaldu du: “Gaia denerako oso jendetsua izan zen argazkia”. Familiak gerturatu ziren batez ere; baita gauza bera gertatu zaien familiak ere. “Oiartzunen horrelako ekitaldi bat egitea asko eskertu dute”. Jendearen aldetik maitasun hitz asko jaso dituztela diote.
