Eskoletara eramango du artea eta kultura Herri Arte Eskolak
Bigarren urtez eskolaz kanpoko klaseak emango ditu hainbat diziplinetan Herri Arte Eskolak herriko ikastetxeetako batzuetan.
Herri Arte Eskola ikastetxeetan 2024 Bigarren urtez jarraian, Errenteria-Oreretako hainbat ikastetxetan arte plastikoak, musika, dantza, gorputz adierazpena, hitza eta antzerkia lantzeko klaseak egingo ditu Herri Arte Eskolak. Eskola orduz kanpoko klaseak izango dira, Lehen Hezkuntzako 3. eta 6. Maila arteko ikasleei zuzenduta. Ikastetxeekin elkarlanean ondutako programa da, eta helburua, artea eta kultura herritar gazteenen eskura jartzea da, sorkuntzaren bidez, diziplina artistiko anitzetan trebatzeko eta sormena lantzeko aukera eskainiz.
Eguerdiko atsedenaldian jasoko dituzte eskolak ikasleek, ikastetxeetan bertan, urritik maiatzera. Koldo Mitxelena Herri Ikastetxea, Bizarain Ikastola, Cristobal Gabon ikastetxea, eta Orereta Ikastolak egin dute bat proiektuarekin aurten. hainbat diziplina landuko dituzte: dantza eta gorputz adierazpena, Arte plastikoak eta ikusizkoak, Hitza-antzerkia, eta Musika praktika instrumentala.
Herri Arte Eskolako zuzendari pedagogikoa da Beñat Ralla. Pozik azaldu da programak izan duen bilakaerarekin, “iaz bi ikastetxerekin eta 10 bat ikaslerekin hasi genuen programa, aurten ikasle kopurua seikoiztu, eta ikastetxe kopurua bikoiztu egin da”.
Herri Arte Eskola egun eskaintzen duen hezkuntza artistikoa Errenteria-Oreretako auzoetara zabaldu eta irisgarriagoa egin nahi du bestalde, eta horretarako, dituen baliabideak erabili nahi ditu ikastetxeekin lotura egonkorrak ezartzeko.
Izena emateko epea zabalik
Ikastetxe batzuetan oraindik ere zabalik dago izena emateko epea. Hala, Cristobal Gamon, Koldo Mitxelena eta Orereta Ikastolan plaza libreak daude. Interesa dutenek Herri Arte Eskolaren web orritik egin dezakete izena ematea (klik hemen).
Ikastaroaren prezioa 130 eurokoa da, 60 euro matrikulagatik eta 70 euro tasengatik, eta bi kuotatan ordainduko dira. Gainera, familiek dituzten diru sarreren araberako tasa ordaintzeko aukera izango dute. Horretarako, progresibitate eskaera egin beharko da izen ematearekin batera. Informazioa gehiagorako 943 44 96 33 deitu edo posta elektronikora mezua bidal daiteke (klik hemen).
