Fanderiako futbol zazpiko zelaiko belar artifiziala aldatu dute
Zelai horrek hogei urte bete ditu, eta eremu horren baldintzengatik, esku hartzea "beharrezkoa" zela adierazi du udalak.
Argazkia: Herri Bizia. Errenteriako Udalak Fanderiako futbol zazpiko zelaiko belar artifiziala aldatu du. Zelai hori eskola kiroleko taldeek, udalerriko kirol taldeek eta herritarrek erabiltzen dute futbolean aritzeko. Jarduketa horietan soropil artifiziala aldatu da, guztira 2.440 metro koadroko azaleran eraginez. Lanen aurrekontua 46.000 eurokoa izan da, BEZa barne.
Futbol zazpiko zelaiak hogei urte bete dituela gogorarazi du udalak, eta, ordutik, asko erabili da kirol eremu hori. Gune horren baldintzengatik, esku hartzea “beharrezkoa” zela adierazi du udalak. Hobekuntza horietan kirol zoladura ordeztu dute, “kirol errendimendu egokia bermatuko zuten beharretara egokitzeko, erabiltzaileei kalte desegokiak saihestuz eta, aldi berean lurzoruaren kirol prestazioak hobetuz”. Horrez gain, zelaiaren ezaugarri mekanikoak “egokienak ez zirela” onartu dute, hala nola, kolpeak xurgatzea, deformazio bertikala, baloiaren errebote bertikala edota baloiaren errodadura.
Kirol instalazio horren erabilera herritarrentzat librea dela oroitarazi du udalak, futbol federatuari dagozkion entrenamenduak edo partidak daudenean izan ezik.
