Nerabeak ere jarriko dituzte filosofatzen
Lehenengoz ariko dira DBHko gazteak Filosofiaren Plazan. Lehen Hezkuntzako 3. eta 6. Maila artean
Filosofiaren Plazaren laugarren ekitaldia berrikuntzekin dator, izan ere lehenengoz, aukera emango die DBHko gazteei hausnarketan aritzeko. Aurten beraz, bi talde ariko dira, DBHko gazteak batean, eta Lehen Hezkuntzako 3 eta 6. mailako ikasleak bestean.
Filosofiaren Plazaren atzean Errenteriako Udalaren eta Jakinmin Praktika Filosofikoen Elkartearen elkarlana dago. Sormenaren inguruko ikerketa eta elkarrizketarako beharrezkoak dituen gaitasunen trebatzea ardatz ditu egitasmoak. arrakasta handia izan zuen iaz, hogei aurretik gora aritu ziren saio denetan Lekuona Fabrikan.
Ibai Maritxalar margolaria, Idoia Hernandez Hatxe musikaria, Idoia Lizeaga bitxigile eta lore-artean irakaslea, Ixiar Garcia artista, Eva Diaz de Isla jostailu sortzailea eta Ainara Gurrutxaga eta Miren Alcala antzezleak izan zituzten haur filosofoek bidelagun abentura horretan.
DBHkoei zuzendutako plaza berria ontzeko bilera informatiboa antolatu dute hilaren 25ean, “beren interesak zeintzuk diren jakin nahi dugu, zeren inguruan hausnartu nahiko luketen, zer sortu”, azaldu dute antolatzaileek.
Lehen Hezkuntzako ikasleentzat azaroaren 8an antolatu dute lehen saioa 17:30etik 19:30era. aurten, haurrek erabakiko dute zein diziplina eta ekintza zehatz egin nahi dituzten artista eta bestelako sortzaile helduekin. Gainera, eguraldiak laguntzen duenean, sioak Lekuona Fabrikaren ondoan dagoen parkean egingo dituzte.
Urko Redondo, Joxemari Carrere, Xabier Obeso, Ander Fernandez, Alain Maya, Ibon Huarte eta Gema Ines Murillo dira denbora honetan zehar parte hartu duten beste sortzaile batzuk. Edizio berrian, beste hainbat izen interesgarri gehituko zaizkio proiektuari. Jakinmin Praktika Filosofikoen Elkarteko Xabi Salaberria eta Eva Domingo bidelagun izango ditu Filosofiaren Plazak.
