Hilaren 27an, Trintxer Mendi Taldearen XXXI. Ibilaldi Neurtua
Ohikoa duten bezala, Mendiola eta Ulia artean egin behar dute bidea partaideek. Ondoren bazkaria egingo dute Trintxer elkartean.
XXXI. Ibilbide Neurtua antolatu du Trintxer Mendi Taldeak hilaren 27rako (igandea). Ohiko duten bezala, Mendiola-Ulia artean izango da, Trintxerpeko azokatik abiatuta. Izen emateak taldearen posta elektronikora idatziz, edo 679 23 36 60 (Gorka) telefono zenbakira deituz egin daitezke. Trintxerreko bazkideek 10 euro ordaindu behar dituzte parte hartzeko, bazkide ez direnek 12, eta haurrek 5. 08:00etan abiatuko dira martxalarien taldeak; 08:30ean, berriz, haurrentzako bira txikiagoa egiteko aukera izango da. Behin ibilaldia eginda, Trintxer elkartean bazkaltzeko aukera izango dute hala nahi dutenek, 14:30ean. 25 euroko prezioa dute otordurako tiketek. Ibilbide neurtuaren eguna izateaz gain, Trintxerren Bazkide Eguna ere bada hilaren 27koa.
Esan bezala, 08:00etan hasiko dira abiatzen martxalariak, azokatik. Helmuga puntua Serafin Esnaola plaza izango da. Taldeak pertsona bakarrekoak, bikoak edo hirukoak izan daitezke, eta minutuero aterako dira. Ibilbidean zehar hiru puntutan zigilatu behar dituzte txartelak partaideek, eta laugarren eta azken gunea helmugakoa izango da.
Honakoa da, labur, ibilbidea: Trintxerpeko azoka, San Pedroko puntak, Herri Ametsa Ikastola (lehen kontrola), hustubidera jaisten den pisa (bigarren kontrola), hustubidera jaisten den pista II (hirugarren kontrola), Serafin Esnaola plaza.
