Oiartzungo Burujabetza Egunarekin itxi dituzte jardunaldiak
Herri ituna izan du hizpide Joana Mendiburu Oiartzungo alkateak. Egunarekin bukatzeko herri bazkaria egin dute eta ondoren Yacovlev 42 eta Zurrounk herriko musika taldeen eta Zea Mays taldearen kontzertuak egingo dira Landetxen.
Oiartzungo Burujabetza Eguna izan da gaurkoa, Burujabetza jardunaldien hirugarren eta azken eguna, hain zuzen. Done Eztebe plazan bildu dira herri proiektuan dabiltzanak, eta egunaren aurkezpena egiten Labore Oarsoko kudeatzaile Itsaso Larretxea, Ekonomia Sozial eta Burujabetzako zinegotzi Ibon Mitxelena aritu dira.
Jarraian, iaz identifikatutako hiru erpinak (herri mugimendua, eragileak eta udala) batu dituen mahai sektorialaren gaineko azalpenak emateko aurkezpena egin dute hainbat ordezkarik: Aiako Harria Gaztelumendi Euskara zinegotziak; Xabi Arroyo Euskara mahai kideak; Maitane Elosegi Zaintzadiko kideak; Olaia Lasa Ongizate zinegotziak; Ioana Iguiñez Gezamina elkartekoak; Jon Iragorri Argiturriko kideak; eta Xabier Iragorri, Labore Oarsoko kideak eta Errigorako Oarsoaldeako kudeatzaileak.
Saio honetan herri ituna izan dute hizpide ere eta Joana Mendiburu Oiartzungo alkatea aritu da azalpenetan. Halaber, burujabetzaren eta eraldaketaren bidean lanean ari diren egitasmoen azoka egin dute plazan bertan.
Ondoren, bazkari herrikoia egin dute bertako produktuekin, plazan bertan. Arratsaldean, 18:30ean herriko Yacovlev 42 eta Zurrounk musika taldeen kontzertuez gozatzeko aukera egongo da Landetxen. Egunarekin bukatzeko, Zea Mays taldeak kontzertua eskainiko du ere.
