Herri Libre Bat! kanpaina antolatzen hasteko bilera egingo dute etzi
Gure Eskuren dinamika da Herri Libre Bat!, eta kanpaina antolatzen hasteko lan bilera bat egingo dute etzi (hilak 23), 19:00etan, Arizmendienean.
Oiartzungo Gure Eskuk ohar batean adierazi duenez “une historiko baten aurrean gaude, herri gisa urrats handi bat egiteko baliatu behar dugun aukera baten aurrean”. Lurraldez lurralde estatus politikoen inguruko eztabaidak zabalik daudela diote, nazio / herri aitortzaren afera agenda politikoaren erdigunean egongo dela epe motzean; eta gehitu dute burujabetzaren aldeko aldarria gero eta zabalagoa dela askotariko gizarte dinamiketan.
Momentu hori aprobetxatzeko “arduraz, anbizioz eta ilusioz jokatzeko unea” dela diote, “herri gisa aitortua izan eta gure etorkizunaren jabe izatea baitago jokoan”. Gauzak horrela, lehentasunezko gaitzat jo dute “herri gisa ditugun eskubideak aitortzea”, eta “gure herriaren potentzia mobilizatzailearen mailako erantzuna artikulatzeko” garaia dela azpimarratu dute. “Denok batera eta gure indar guztiekin bultzatzeko unea iritsi da”.
Ildo horretatik, Herri Libre Bat! dinamika sortu dute erronka horri maila sozialean ekarpena egiteko, “munduaren aurrean erabakitzeko eskubidea duen zazpi lurraldeko herri gisa aurkeztu nahi baitugu”. Kanpainaren helburu nagusiak Euskal Herria nazio bat dela irudikatu eta aldarrikatzea zein erabakitzeko eskubidea sustraitu eta herri ilusioa piztea dira. Erronka horretan jarriko du “bere indar guztia” Gure Eskuk datozen bi urteetan.
Ekinaldi horren lehen inflexio puntua azaroaren 16an egingo duten Bagara bideo maratoia izango da. Tokian tokiko ezaugarrietatik abiatuta “Euskal Herriarekin konektatuko duen ekimen” gisa definitu dute, “360 graduko Euskal Herria erakutsiko duen ekimen” gisa, alegia. Erabakitzeko eskubidearen eta herri nortasunaren aldeko grabazioen bidez hamabi orduko bideo kate bat osatzea da helburua.
Kanpaina hori Oiartzunen antolatzen hasteko lan bilera bat egingo dute etzi (hilak 23), 19:00etan, Arizmendienean.
