Harrera Astean elkarbizitza, herri kohesioa eta inklusioa nagusi
Igandean (hilak 27) izango da Harrera saioa. 12:00etan herriko plazan elkartuko dira, eta Arizmendieneara joango dira erraldoi txikiekin.
2015ean hasi zen Oiartzungo Udala “Euskal Herriko mugetatik kanpo” Oiartzunera bizitzera etortzen direnei harrera egiteko ongietorri ekitaldia antolatzen. Baina, aurten, lehenengoz, Harrera Astea antolatu dute aniztasuna, kulturartekotasuna eta elkarbizitza lehen lerrora ekartzeko.
Olaia Lasa Ongizate zinegotziak adierazi duenez, “herri kohesioa sendotzen jarraitzeko eta elkartasun harremanak eraikitzeko” egingo dute Harrera saioa, komunitate “anitza eta aberatsa” izateko. Horretarako, beharrezkoa ikusi dute herria bera sentsibilizatzea eta jatorriak ere eragin bat duela ulertaraztea. “Denok ez ditugu aukera berberak, eta horren kontzientzia hartzeko ideiekin osatu dugu aurtengo Harrera Astea”.
Elkar ezagutza sustatzeko eta errealitate eta bizipen ezberdinak partekatzeko espazio berriak sortzeko egitarauak prestatu dituzte. Azken hamabi hilabeteetan Oiartzunera bizitzera joan diren 275 bizilagun berriei ongietorria egiteko ekitaldia igandean (hilak 27) egingo dute. 12:00etan elkartuko dira herriko plazan, eta bertatik Arizmendieneara joango dira erraldoi txikien eta musikarien laguntzaz.
Hilak 21 – 30
- Gari Garaialde Etxabururen …eta bidean Irun. Begirada bat bidean doazen emakumezkoei erakusketa udaletxeko areto nagusian.
Hilak 24
- Zinema: Los reyes del mundo. 19:00etan, Landetxen.
Hilak 27
- 12:00: Harrera saioa Arizmendienean.
- 19:00: Miñan antzezlana Landetxen –Oiartzungo antzerkizaleekin elkarlanean antolatuta–.
Hilak 28
- 11:30: Miñan antzezlana Landetxen, herriko ikasleei zuzenduta.
- 19:00: Komunikabideak eta Europako mugak ispiluaren aurrean: emakume migrante afrikarrak hitzaldia Anaitze Agirreren eskutik, udaletxeko areto nagusian.
Abenduak 1
- Munduko Arrozen Eguna (Abarka GGKeak antolatuta), goizean zehar Kontzejupean.
