Palestina aske nahi dutela aldarrikatu dute pasaitarrek
'Genozidioa stop' lemapean bildu ziren atzo Donibaneko udaletxe parean, Palestina Gernika Herri Ekimenak deituta.
Donibaneko udaletxearen parean bildu ziren pasaitarrak. Leire Vargas bertsolariaren poemek palestinarren borrokari ahotsa jarri zien atzo Euskal Herrian. Pasaian ere Palestinaren kontrako genozidioa salatzera irten ziren kalera, Gernika Palestina Herri Ekimenak deituta. Elkarretaratzea egin zuten arratsaldean Donibaneko udaletxe parean, Genozidioa stop, bakea, justizia, itxaropena lemapean.
Bertsolari, idazle eta itzultzaile durangarrak Euskal Herritik erreparatu dio Gazaren kontrako sarraskiari, eta atzo mobilizazioetan haren ahotsa izan zen haria. Vargasen poemak izan ziren atzoko aldarri nagusiak, elkarretaratze isila izan baitzen.
Hilaren 7an urtebete bete zen Israelek Gazaren kontrako sarraskia abiatu zutenetik, eta “berehalako su etena” aldarrikatzera deitu zuten atzokoan. Mobilizazioa baita, talde honen arabera, “genozidioa geldiarazteko konponbidea aldarrikatzeko jendarte zibilak duen aukera eta itxaropenerako leihoa”. Israelen inpunitateak ez duela mugarik ere salatzera atera ziren atzo, “ezta mugarik ere”. Azken urte honetan Israelek 43.000 palestinar baino gehiago hil ditu eta Gazako azpiegituren %70 “suntsitu” dituela ere salatu zuten atzo.
“Inoiz egin den genozidio krudelenetako baten lekuko gara, eta, hala ere, nazioarteak ez du lortzen izugarrikeria hori geldiaraztea. Gaur egun, nazioarteko komunitatea ez da gai, II. Mundu Gerraren ondoren hornitutako lege tresnak erabiliz, Israelen zigorgabetasunarekin amaitzeko eta Palestinako herritarrei segurtasuna eta itxaropena bermatzeko”, salatu du herri ekimenak.
