Pasaitarren eta ostalarien arteko "bizikidetza atsegina" bermatu nahi du udalak
Kexa ugari jaso ditu udalak, bide publikoan terrazak eta mahaitxoak jartzearekin lotutakoak bereziki. Gutun bat bidali diete ostalari guztiei, indarrean dagoen araudia gogoraraziz.
Herritarren hainbat erreklamazio jaso ondoren, Pasaiako Udalak ostalaritza establezimenduen eta herritarren arteko “bizikidetza hobetzeko” neurri bat hartu berri du. Udalak jaso dituen kexa horien artean, “bide publikoan terrazak eta mahaitxoak jartzearekin eta erabiltzearekin lotutako hainbat arau hauste nabarmendu” baitirela esan du Mikel Garcia Peñil zinegotziak. Kexa horiei erantzunez, udalak gutun bat bidali die ostalariei, indarrean dauden udal araudiak errespetatzearen garrantziaz ohartarazteko.
Zinegotziak aipatu du ostalaritza “Pasaiako bizitza sozial eta ekonomikorako funtsezko zutabea” dela, baina halere, “beste edozein herritarrek bezala, ostalariek ezarritako arauak errespetatzea” funtsezkotzat jo du Garciak, “bizikidetza atsegina bermatzearren”.
Araudi horren arabera, terrazak okupatzeko mugak errespetatu behar dira, “lizentzian ezarrita dauden bezala”, baita bide publikoan mahaiak eta mahaitxoak jartzeko ordutegia ere. Lanegunetan 8:00etan hasten dela gogorarazi du udalak, eta asteburu eta jai egunetan, berriz, 9:00etan. Baimendutako materiala ezarritako ordutegian jasotzeko eskaera egin eta terrazek okupatutako eremuak garbi mantendu behar direla ere gogorarazi du erakundeak.
“Gure helburua ez da ostalaritzako sektorea modu negatiboan seinalatzea, baizik eta haiekin lankidetzan aritzea eta udal baliabideak jartzea haien esku, haien jarduera aratzen jarrai dezaten gainerako bizilagunekin elkarbizitza egokia ziurtatuz”, erantsi du zinegotziak. Bukatzeko, “elkarrekiko errespetua” eskatu du, “gure bizikidetzaren oinarri izan dadin”.
Era beran, zinegotziak azaldu du hondakinen kudeaketari buruzko ordenantza berri bat lantzen ari dela udala. Datozen hiletan sartuko da indarrean, zinegotziaren arabera, “etxeko eta merkataritzako hondakinen kudeaketa hobetzeko” asmoz, “iraunkortasuna eta ekonomia zirkularra sustatuz”.
