Zahartzaro paradigma berria eraikitzeko, parte hartze prozesua Lezon
BIBE egitasmoaren barrukoak azaldu eta ikasturteko prozesuaren berri emateko topaketan 30 lezoar izan dira.
Kultura Aretoko tooaketaren une bat. BIBE egitasmoaren barruan identifikatu diren elementuak garatzeko parte hartze prozesua egingo dute herrian, 2025eko maiatzera arte. BIBEren muinean dago zahartzaroaren paradigma berri bat eraikitzea, maila indibidual eta kolektiboan zentzuzko eta esanahizko bizitza osoa sustatuko duena. Prozesuaren barruko lehen etapan identifikatutako arloak familia osasuna, zaintza, harremanak, garapen pertsonala, bizi proiektuak edo denen ongizatea dira, besteak beste. Hala, maiatzera arteko saio horietan gai horiek landuko dituzte, Lezoko Udalak adierazi duenez. Topaketa-saio horiez gain, gune informalago eta laburragoetan gai espezifikoen gainean hitz egiteko aukera izanen da, tartean kafe tematikoak ere egingo direlarik. Lehen topaketa azaroaren 12rako aurreikusi dute.
Horien guztien berri emateko saioa egin zen Kultura Aretoan, 30 bat lagunen parte hartzearekin. Informazio orokorra emateaz gain, talde txikitan banatuta identifikatutako arloen gaineko lanketa egin zen, gogoeta-dinamika bidez. “Inoiz ez da berandu bizitza betea lortzen saiatzeko edo alderdi horietakoren bat indartzeko”, esan zuten partaideek. Esperientzia baliagarri izaten ari zaiela aitortu zuten Kultura Aretoko bilgunean izan zirenek, eta horrelakoetan komunitateak eta entzute aktiboak duten garrantzia nabarmendu zuten.
Otsailean aurkeztu zuten BIBE egitasmoa Lezon. Han eman zituzten proiektuaren gaineko azalpen zehatzak. Baliatu esteka hau horien berri izateko.
