Zorizko eta apustuzko jokorik gabeko egunaren harira, hitzaldia
Joko-nahasmenduaren gainean ariko dira hilaren 29an—asteartea— Ekintza Bibe elkarteko psikologoak, ezkutuko adikzioa argitara atera asmoz.
Gero eta gazteagoak dira jokoaren desoreka dutenak. Gero eta gazteagoak dira zorizko eta apustuzko jokoaren amaraunean erori eta haiekiko menpekotasuna garatzen dutenak. Hilaren 29an izango da Zorizko eta Apustuzko Jokorik Gabeko Eguna, eta horren harira hitzaldia antolatu du Ekintza Bibe elkarteak. Gipuzkoa du eragin gunea Errenteria-Oreretako Alaberga auzoko 59. zenbakian egoitza duen elkarteak.
Argigarria da erabat antolatu duen hitzaldiaren goiburua: SOS Zorizko joko eta apustuekiko mendekotasuna etxean sartu da. Zer egin dezakegu? Horixe helburua, behin arazoa identifikatuta, ludopatia edota joko nahasmenduari erantzuteko dauden bitartekoak eta moduak herritarren eskura jartzea. Horretan ariko dira elkarteko bi psikologoak astearteko hitzaldian, egunerokotasun betea duen arazoaren gaineko kontzientzia soziala sortzeko.
Ausazko jokoa aurrez aurre egin daiteke horretara bideratutako lokaletan eta ostalaritza establezimenduetan, baita online ere; azken hori astean zazpi egunez eta 24 orduz egin gainera, eskuko telefonoaren bidez.
Ekintza Bibe elkarteko arduradunek, ezkutuko adikzioaren berri ematea behar-beharrezkoa den zalantzarik ez dute: “baita menpekotasun horrek jota dabiltzanek eskura dituzten aukera terauoetikoen berri zabaltzea ere. Joko nahasmenduaren tratamenduan ibilbide luzekoa da gure elkartea”. Eguneroko jardunean jasotzen dituzte kezka handiz deitzen duten senideek, edota posta elektroniko bidezko mezuak, “ezustean zor ekonomiko baten berri jasotzen dutenean pizten dira alarma guztiak. Era berean, errealitate mingarria deskubritzeak, euren senidearen portaera eta aldarte aldakorra ulertzen laguntzen die”.
Antolatu duten hitzaldiak zalantzak “uxatzeko” eta “gertutasun eta itxaropen” giroa sortzeko baliagarria izango dela nabarmendu du Ekintza Bibek, “familiarentzat mendekotasun psikologiko bai heltzeak dakarren zailtasunaren aurrean, informazioa gakoa da, eta oso garrantzitsua da ginera, hori hurbiltasun testuinguru batean egitea”.
Hitzaldia 18:00etan hasiko da Reina aretoan eta gaiarekin kezka duten herritar guztiak deitu dituzte bertaratzera: “Hitzaldian edukian azaldu eta gero, solasaldia zabalduko dugu adikzio psikologikoaren gakoez hitz egiteko espazio bat sortzeko”.
Honakoak dira Ekintza Bibe elkartearen telefono zenbakiak: 943 34 02 02 eta 682 51 62 98.
