Eva Forest Liburutopiaren bertso paper lehiaketan, Legorburu irabazle
'Bertsopia' lanarekin eskuratu du garaipena errenteriarrak; hiru lan sailkatu ziren finalera, eta Legorbururena izan zen epaimahaiaren iritzirako, onena.
Legorburu bertso papera eta saria esku artean. Berdin du generoak, den-denetan garaitzeko gai dela nabarmen utzi du beste behin ere, Iñigo Legorburuk. Oraingoan, Eva Forest Liburutopiak antolatutako bertso paper lehiaketa da poltsikoratu duena. Larunbat arratsaldean egin zuten sari banaketa Gasteizko Alde Zaharreko Beheko Sua elkartean. Banaketaren aurretik, Bertsoko topaketa egin zuten, bertso poteoa Gasteizko kaleetan barrena etxeko bertsolariekin.
Jasotako lan guztietatik hiru iritsi ziren finalera: Iñigo Legorburu errenteriarrarena, Ricardo Gonzalez de Durana gasteiztarrarena, eta Ainhoa Garcia hernaniarrarena. Bertsoak kantatu behar izan zituzten lehiakideek eta epaimahaiaren ebazpenaren zain izan ondoren, Legorbururena aukeratu zuten irabazle.
Bertsoa eta utopia lotzen dituen Bertsopia lana aurkeztu zuen lehiaketara errenteriarrak: “Gipuzkoako bertso txapelketan murgilduta gaudenez, egoera aprobetxatu dut neure buruari galdetzeko etorkizunean ea nork kantatuko duen, nori emango zaion ahotsa, zer balio nagusituko diren oholtzan, aniztasunak presentziarik izango duen… eta galdera horiei guztiei erantzuten saiatu naiz”.
Hamabi bertso horietan bitarrak ez diren bertsolariak, Maialen Lujanbio dekano duen bertsolaritza fakultatea, exo eskeletodun gurpildun aulkiko jendea, edo Latinoamerikako herrialdeekin kantu inprobisatuari buruzko txapelketa mundiala hartu ditu hizpide, “xehetasun futuristen laburpen ba da, eta errealitatearen itxura eman nahi izan diot”.
Legorburuk Eva Forest Liburutopia liburu dendan produktuetan gastatzeko erosketa bonu bat jaso zuen sari gisa. Pozik da emaitzarekin, “niretzat oso ohikoa ez den ingurune batean parte hartu dut, Araban, eta oso pozik naiz gaur egun bizi dugun garai latzean ekitaldia oso positiboa izan delako”.
Saria Garciari eman
Saria irabazi bazuen ere, ez du berak jaso, beste lehiakide bati ematea erabaki baituzen errenteriarrak, Ainhoa Garcia hernaniarrari hain zuzen ere: “Justuena hori iruditu zitzaidan, bere lana egiteko erabili duen indar, pasio eta maitasuna argi gelditu baita”.
Iraganeko bidegabekeriak izan zituen hizpide bere lanean Garciak, eta Xabier Silveiraren Gure herri ttiki hau doinuan idatzi bertso sorta. Pierre de Lancreren sorgin ehiza edo frankismoa aipatu ditu hernaniarrak, eta bide horiek ez direla ibili behar aipatu, mundu utopiko batera iristeko. Ukitu feminista nabarmena Garciaren lanean; kitarraren doinuz lagundu zuen bertso sorta.
