Lezo Euskaragarri egitasmoa, urratsak egiten
Atzo Lezo Euskaragarri prozesuko azken eztabaida egin zen Aiton Bordan. Orain, hurrengo pausoa izango da proposamen guztiak bildu eta Lezo euskaldunagoa izateko ekintza zehatzak definitzea.
Atzo Lezo Euskaragarri prozesuko azken eztabaida egin zen Aiton Bordan, bertako erabiltzaileen parte hartzearekin. Bertaratutakoek euskaldunok jasandako jazarpenaren eta bazterkeriaren “kontakizun mingarriak” kontatu zituztela adierazi du udalak, baita etorkizunean euskaraz bizitzeko “gogo eta ilusio bizia” ere.
Aiton Bordako saioarekin Lezo Euskaragarri egitasmoko prozesu parte hartzailea itxi da. Lezo Euskaragarri Lezoko Udalak eta herritarrek bultzatutako iniziatiba bat izan da, eta herriko hainbat eragilek hartu dute parte prozesuan: gazteek, gurasoek, ikastetxeek, aisialdi eta kirol taldeek, merkatariek, jubilatuek edota kultur eragileek. Udalak eskerrak eman dizkie parte hartzaile guztiei, “ekarpen eta iradokizunek euskararen aldeko etorkizuneko proiektuak definitzen lagunduko baitute”.
Parte hartze saioak bukatuta, hurrengo pausoa izango da proposamen guztiak bildu eta “Lezo euskaldunagoa izateko ekintza zehatzak definitzea”, ondoren herritarrei aurkezteko. Udalak jakinarazi du “laster” plazaratuko dutela euskararen normalizazioa bultzatzeko eta hizkuntza eskubideak bermatzeko ekarpen guztien emaitzak bilduko dituen Lezo Euskaragarri plan estrategikoa.
