Energia aurrezten ikasteko kanpaina bat abiatu dute
Datorren asteazkenean tailer bat egingo dute Antxon. Ondoren, etxean neurketak egiteko maleta bat jasoko dute partaideek.
Pasaiako Udalak eta Gipuzkoako Eraldaketa Energetikorako Bulegoak elkarlanean kanpaina bat abiatu dute. Energia Argitu Kit izenburupean etxean energia eraginkortasuna hobetzeko eta faktura elektrikoa murrizteko helburua duen kanpaina antolatu dute. Udaleko iturrien arabera, kanpaina honen helburua “herritarrei etxeko energia kontsumoa modu pertsonalizatuan diagnostikatu eta ulertu ahal izateko beharrezko tresnak ematea” da, “baita energia eraginkortasuna hobetzeko eta faktura elektrikoa murrizteko irtenbideak proposatzea ere”.
Kanpaina honen barruan, lehenik, azalpen tailer bat egingo dute. Azaroaren 6an (asteazkena da) egingo dute, Antxoko Kultur Etxean, Aurreztu dirua eta irabazi osasunean zure etxebizitzan titulupean. 18:30ean izango da.
Tailerraren ondoren, partaideek Energia Argitu Kita izeneko maleta bat jasoko dute maileguan. Kit horrek aukera ematen du etxeetan neurketak egiteko eta energia gabeziak detektatzeko. Erraz erabiltzeko kita izango dela azaldu dute udaleko iturriek. Kanpaina bukatzeko, partaideek etxebizitzen birgaitze energetikoko espezialistekin lortutako emaitzei buruzko zalantzak kontsultatu ahal izango dituzte.
Kanpainan parte hartzeko, bihar (azaroak 1) izango da izena emateko azken eguna. Helbide honetara idatziz, 605 757 687 telefono zenbakira deituta edo webgune honetara jota.
