Lehen sektoreko proiektuak diruz lagunduko ditu aurten ere udalak
50.000 euroko diru laguntza lerroa ireki du udalak, eta dagoeneko egin daiteke eskaera erregistro elektroniko bidez edo udaletxean bertan.
Oiartzunen dauden lehen sektoreko proiektuak diruz lagunduko ditu aurten ere udalak; 50.000 euro bideratuko dituzte, eta 1.000 eta 2.000 euro arteko laguntza jasoko dute herriko ekoizle eta abeltzainek dituzten ustiapen eta gastuen arabera. “Lehen sektoreak bizi duen egoera ekonomiko zaila arintzen lagundu” nahi du udalak, eta “bertako nekazaritza eta abeltzaintza proiektuen iraunkortasuna babestu”.
Aurreko deialdietan bezala, urtean zehar ustiategiek izan dituzten gastuak estaltzera bideratuko dute dirua, hala nola:
- Inbertsio eta ustiategien hobekuntzak.
- Oiartzungo baserritarren lan baldintzak hobetzeko ekintzak.
- Abandonatutako nekazal lurretan jarduerak berreskuratzeko lanak.
- Nekazaritza makineria eta ekipoen erosketa.
- Baratzezaintza eta lorezaintza intentsiborako instalakuntzak.
- Berrikuntza teknologikora edo belaunaldien errelebora bideratutako aholkularitza azterketa lanak.
- Ekoizpen ekologikoa bultzatzeko egitasmoak.
- Albaitaritza zerbitzuen gastuak.
- Nekazaritza erabilerarako ur gastuak eta abereen bazka eta pentsuen ordainketa.
Oinarriak, eskaera orria eta deialdiaren xehetasunak udalaren webgunean daude eskuragarri. Dagoeneko irekita dago eskaerak aurkezteko epea, eta erregistro elektroniko bidez edo udaletxe arreta zerbitzuan egin daiteke, abenduaren lehenera arte.
